User Rating: 0 / 5

Star InactiveStar InactiveStar InactiveStar InactiveStar Inactive
 

 

  သရုပ်ဖော် ပန်းချီထိန်လင်း

လွန်ခဲ့သော ၁၀နှစ်နီးပါးက ထောင်တွင်းလုပ် တောင်ပံခတ်သံမဂ္ဂဇင်း မှ ကဗျာဆရာရည်မွန် အင်တာဗျူးကို ကောင်းကင် စာမျက်နှာပေါ်တွင် လေလိုရေလိုကဗျာ(၁) အဖြစ်တင်ဆက်ခဲ့ပါသည်။ယခုကျန်ရှိနေသော ဒုတိယပိုင်းကိုဆက်လက်ဖေါ်ပြလိုက်ပါသည်။

          တောင်ပံ။        ။ကဗျာ နဲ့  ဈေးကွက်စီးပွားရေး။

          ရည်မွန်။                   ။ကဗျာဆရာတွေဟာ သူတို့ကိုယ်တိုင် ဈေးကွက်စီးပွားရေးနဲ့ မကင်းနိုင်ပေမယ့် သူတို့ကဗျာတွေကိုတော့ ဈေးကွက်စီးပွားနဲ့ ကင်းကင်းပြတ်ပြတ်ရှိစေချင်တယ်။ ကဗျာဟာ စာရွတ်စုတ်တခုပေါ် ရေးထားတာဖြစ်ချင်ဖြစ်မယ်။သို့သော် အဲဒီစာရွတ်စုတ်လေးကို ဘဏ်ချက်လက်မှတ်နဲ့  မလဲနိုင်တဲ့ သူတွေရှိနေသမျှ ကဗျာရှိနေပါအုံးမယ်။ ကဗျာထွန်းကားတဲ့ ခေတ်ဟာ ယဉ်ကျေးမှုမြင့်မားတဲ့ခေတ်ပါ။ခင်ဗျား အင်းဝခေတ်ကို သတိရကြည့်ပါ။

          တောင်ပံ။        ။ဒီGlobalizationခေတ်အခါသမယမှာ မြန်မာကဗျာဆရာတွေရဲ့ အနုပညာ ကိုယ်ရည်ကိုယ်သွေးတွေ ကမ္ဘာအနှံ့  ဖြန့်ကျက်နိုင်ဘို့ ဘယ်လိုအားထုတ်ကြမလဲ။

          ရည်မွန်။                   ။လိုအပ်ချက်နှစ်ခုရှိပါမယ်။ တခုက လူ့အဖွဲ့အစည်းရဲ့လွတ်လပ်မှု(တနည်း အနုပညာသစ်အပေါ် အားပေးချီးမြှင့်မှု)နဲ့ တခုက ကဗျာဆရာများရဲ့  ကိုယ်တိုင်အားထုတ်မှုဖြစ်ပါတယ်။

                             ကဗျာဆိုတာ ဘာသာစကားနားမလည်တောင်မှ ရွတ်ဆိုသံကြားရုံနဲ့ နှစ်သက်မှုကိုဖြစ်စေတဲ့ အရာပါ။လူ့အဖွဲ့အစည်းဟာအနုပညာနဲ့ ပတ်သက်တဲ့ အ၀င်/အထွက်တံခါး အားလုံးကို ဖွင့်ထားဘို့ လိုပါမယ်။ ကဗျာကိုProfessional ယူထားတဲ့ကဗျာဆရာများအနေနဲ့လဲ အဟောင်း/အသစ်၊ ပြည်တွင်း/ပြည်ပ ကဗျာများကိုလက်လှမ်းမီသမျှ ‘အလုပ်တခု’ အနေနဲ့ ဆည်းပူး လေ့လာနေသင့်တယ်။ ကဗျာနဲ့ပတ်သက်တဲ့ စူးစမ်းရှာဖွေမှု၊အသစ်တီထွင်ဖန်တီးမှု ကိုအမြဲအာရုံစိုက်ပြီး ပြုလုပ်နေသင့်တယ်။

ကဗျာဟာပါရမီရဲ့အလုပ်သာဖြစ်တယ်လို့ တကြောင်းစွဲမှတ်ယူပြီး အတတ်ပညာကိစ္စကိုလျစ်လျူရှုမထားသင့်ပါဘူး။ နိုင်ငံတကာ ဘာသာစကားနဲ့ပါ ကျယ်ကျယ်ပြန့်ပြန့် ဘာသာပြန်ဆို ရေးသားထားနိုင်ဖို့လဲလိုပါမယ်။စာပေအနုပညာကို အားပေးလိုတဲ့ အသင်းအဖွဲ့တွေ၊ ဖေါင်ဒေးရှင်းတွေ ပေါ်ပေါက်လာဘို့လဲ လိုအပ်တယ်။မြန်မာကဗျာကို စိတ်ဝင်စားတဲ့ မြန်မာကဗျာအဆင့်အတန်းကိုလေ့လာအကဲခတ်လိုတဲ့သူတွေ ကမ္ဘာမှာ ရှိနေပါတယ်။ လူ့အဖွဲ့အစည်းအနေနဲ့ သူတို့ကိုကြိုဆိုနိုင်ဖို့နဲ့ မြန်မာကဗျာဆရာတွေ ကိုယ်တိုင် အဆင့်မီ အနုပညာတွေ ဖန်တီးနိုင်ဘို့ပဲလိုပါမယ်။ဒီလိုဆိုရင် ပြာဖုံးမီးခဲတွေ ရဲခွင့်ရကြမှာပါ။

                   တောင်ပံ။        ။Modern, Post Modernကဗျာတွေကို ကျောင်းသင်ရိုးတွေမှာ ပြဋ္ဌာန်းရင် ပညာရေးအပေါ် ဘယ်လိုသက်ရောက်မှုမျိုးတွေရှိလာနိုင်မလဲ။

                   ရည်မွန်။                   ။ဒီနေရာမှာ မော်ဒန် ပို့စ်မော်ဒန် စတဲ့ ဝေါဟာရတွေ ခဏထားလို့ ခေတ်ပေါ်ကဗျာလို့ပဲ ယေဘုယျခေါ်ဝေါ်သုံးစွဲပါရစေ။အခုဆိုရင် ခေတ်ပေါ်ကဗျာဟာ အသစ်လှုပ်ရှားမှုသက်သက်မဟုတ်တော့ဘူး။မြန်မာကဗျာရဲ့ အဓိကရေစီးကြောင်းဖြစ်ခဲ့ပါပြီ။ ကဲ ဒီလိုဆိုရင်လူငယ်တွေဟာဒီရေစီးကြောင်းကို မသိအပ်ဘူးလား။မလေ့လာအပ်ဘူးလား။ကျွန်တော်တို့မှာ ဆယ်စုနှစ်တခု၊နှစ်ခု၊သုံးခုစသည်ဖြင့် အချိန်ကာလတခုရဲ့ အစစ်အဆေးခံပြီးသား ခေတ်ပေါ်ကဗျာတွေလဲ အသင့်ရှိနေပါပြီ။

                                      ကျွန်တော့အမြင်ကတော့ ဒီကဗျာသစ်တွေကိုသာ ကျောင်းသင်ရိုးမှာပြဋ္ဌာန်းမယ်ဆိုရင် လူငယ်တွေဟာအပေါ်ယံအကာထက် အတွင်းအနှစ်အသားကိုပိုပြီးကြည့်တတ်၊မြင်တတ်တဲ့သူတွေ ဖြစ်လာမယ်။စူးစမ်းရှာဖွေဘို့၊အသစ်တီထွင် ဖန်တီးဘို့ စိတ်အားထက်သန်တဲ့သူတွေဖြစ်လာမယ်။ကဗျာဟာ ကာရန်ရှိလဲမဟုတ်။ကာရန်မဲ့လဲမဟုတ်၊လူတွေကိုနှစ်သက်စေတဲ့ပစ္စည်းတခုမျှသာဖြစ်တယ်ဆိုတာ လူငယ်တွေသိမြင်လာမယ်။ တကယ်တော့စာသင်ခန်းထဲမှာလဲ အဟောင်းအသစ်မျှတစေသင့်ပါတယ်။အဟောင်း(ဂန္ဓ၀င်)သက်သက်ကိုပဲ သင်ကြားပေးနေမယ်ဆိုရင် လူငယ်တွေကို နောက်ပြန်လမ်းလျှောက်ခိုင်းနေသလို ဖြစ်နေရော့မယ်။

                   တောင်ပံ။        ။ခင်ဗျားရေးခဲ့သမျှတွေ Solo Show လုပ်ဖို့ စိတ်ကူးရှိမလား။

                   ရည်မွန်။                   ။ကျွန်တော်ဖြစ်ဖူးတဲ့ (ခန္ဓာ)တခုနဲ့ အတူ ကဗျာတချို့လောကမှာထားခဲ့ချင်ပါတယ်။

                   တောင်ပံ။        ။နောက်ဆုံးမေးခွန်း။ ကဗျာဆရာရဲ့တကိုယ်ရေ တိမ်းညွတ်မှုပြောပြနိုင်မလား။

                   ရည်မွန်။။         ။ခင်ဗျားမေးခွန်းကိုပဲ ကျွန်တော်ကိုယ့်ကိုကိုယ်ပြန်မေးကြည့်နေပါတယ်။ကျွန်တော်ဘာကိုတိမ်းညွတ်သလဲ။ဘာကို(အထူး) စိတ်ဝင်စားလဲ။ရတဲ့အဖြေကတော့ လူတွေရဲ့အရေးအရာကိစ္စမှန်ရင်ကျွန်တော် စိတ်မ၀င်စားတာ ဘာမှမရှိဘူးဆိုတဲ့အချက်ပါပဲ။မီးဖိုချောင်ကိစ္စမှသည် ပန်းပဲထုခြင်းထိ၊ ရီလေတစ်သီအိုရီမှသည် မဟာသတိပဌာနသုတ္တန်အထိ၊သားချော့တေးမှသည် မြတ်သောအကျင့်အထိ အားလုံးကိုကျွန်တော်စိတ်ဝင်စားပါတယ်။

          ဒီအရေးအရာတွေထဲမှာ ကဗျာကတော့ ငယ်ပေါင်းလို့ပြောလို့ရမယ်ထင်ပါတယ်။အသက်ကြီးလာလေလေ၊တယောက်ပေါ်တယောက် ရမ္မက်နည်းနည်း မေတ္တာများများ ထားနိုင်လာလေပါပဲ။

          ခုအချိန်မှာ ဗသျိုးကြီး ကိုပဲအားကျနေမိတယ်။နွေညမှာလက်မဲ့ လျှပ်ရောင်ကို စောင့်ကြည့်ရင်း ကဗျာရေးချင်နေပါတယ်။