Star InactiveStar InactiveStar InactiveStar InactiveStar Inactive
 

သရုပ်ဖေါ်ပန်းချီ မင်းကျော်ခိုင်

 

 

ဒီလိုဗျာ။  နေ့စဉ်ရက်ဆက်ဆိုသလို ကျွန်တော်ဟာ လိမ္မော်သီးကို သတိရနေတယ်။ ဘာကြောင့် သတိရ နေသလဲဆိုတာတော့ ကျွန်တော်လည်း မသိဘူး။ တစ်နေ့ တစ်နေ့ ကျွန်တော့်စိတ်ထဲ လိမ္မော်သီးပဲ ရှိနေတာတော့ သိတယ်။ သွားလည်း ဒီစိတ်၊ စားလည်း ဒီစိတ်ဆိုသလိုမျိုး သွားလည်း ဒီလိမ္မော်သီး၊ စားလည်း ဒီလိမ္မော်သီး ဖြစ်နေတာ။

 


လိမ္မော်သီးကို သတိရတဲ့ ပြဿနာက ဘယ်ကစလဲဆိုတော့ လိမ္မော်သီးနဲ့ ကျွန်တော် တွေ့ပြီး ကတည်းက ဆိုပါတော့။ ကျွန်တော်ဆိုတာက ကျွန်တော့်ကိုပြောတာ။ လိမ္မော်သီးက လိမ္မော်သီးကို ပြောတာ။ အင်း။ ဟုတ်တယ်။ လိမ္မော်သီးနဲ့ကျွန်တော်တွေ့ခဲ့တာ။ အဲဒီကနေ ဒီနေ့လို့ အလွမ်းဇာတ်ဖြစ်လာတယ်ပေါ့ဗျာ။  သတိရတယ်ဆိုတာက လွမ်းခြင်းတစ်မျိုးပဲ မဟုတ်လား။ ကျွန်တော်ထင်တာ ပြောတာပါ။ ရမ်းသမ်း ပန်းသမ်း ပြောတာမျိုးတော့ မဟုတ်ဘူး။


သတိရတယ်ဆိုတာ လွမ်းခြင်းတစ်မျိုးပဲ။ ဒါအမှန်ပဲ။ လွမ်းခြင်းဆိုလို့ ကျွန်တော်လွမ်းတဲ့ အလွမ်းက ခြင်းထဲ ထည့်ထားတဲ့ အလွမ်းကို ပြောတာမဟုတ်ဘူး။ အိုင်ချင်းတို့လို၊ တျာချင်းတို့လိုမျိုး လွမ်းချင်းလည်း မဟုတ်ဘူး။ ကျွန်တော်ငယ်တုန်းကတော့ အမေဈေးက ပြန်လာရင် ဈေးခြင်းထဲမှာ လိမ္မော်သီးတွေ ပါလာတတ်တယ်။ ကျွန်တော့် လိမ္မော်သီးက အဲ့ဒီလိမ္မော်သီးတွေနဲ့လည်း မတူပါဘူး။ အခုနေများ ကျွန်တော် လိမ္မော်သီးကို
သတိရနေတာဆိုတာအမေသိရင်ဈေးကနေ၀ယ်လာဦးမလားမသိဘူး။

လွမ်းတာဆိုလို့ တချို့လူတွေ လွမ်းတာ သိပ်ရယ်စရာ ကောင်းတယ်။ လူတွေသိအောင် လွမ်းပြရတာမျိုးတို့ဗျာ။ စတန့်ထွင်လွမ်းပြတာမျိုး။ အလွမ်းဖက်ရှင်၊ ဘာညာဆိုတာမျိုး တွေကလည်း ရှိတတ်သေးတယ်ဗျာ။ နောက်များဆို ပွဲတော်တွေဘာတွေ လုပ်ပြီး လွမ်းကြ ဦးမလားမသိဘူး။ လွမ်းတာပဲဗျာ။ လွမ်းတာပဲပေါ့။ ဘာမှ အပိုတွေ လုပ်နေစရာမလိုပါဘူး။ ကျွန်တော်ကတော့ ကျွန်တော့်လိမ္မော်သီးကို ရိုးရိုးလေးပဲ လွမ်းတာ။  ရိုးရိုးလေးပဲသတိရတာ။

ကျွန်တော်က လိမ္မော်သီးကို သတိရတယ်ဆိုတော့ ကျွန်တော်လွမ်းတယ်ပေါ့။ လွမ်းလိုက်တာ လိမ္မော်သီးရေလို့ နောက်ကျတော့ ပြောင်းပြောမယ်။ အခုတော့ ကျွန်တော့် လိမ္မော်သီးကို သတိရနေတယ်။


ခင်ဗျားတို့ပြောတာဟုတ်တယ်။ လိမ္မော်သီးတွေက အများကြီး။ ဒါပေမယ့် ကျွန်တော့် လိမ္မော်သီးက စ်လုံးတည်း။ တစ်နေ့ကျ ဖြစ်ချင်တော့ ကျွန်တော့် လိမ္မော်သီးလေး ပျောက်သွားတယ်။ စသိခါစတော့ ကျွန်တော်လည်း တော်တော် စိုးရိမ်သွားတယ်။ တစ်လုံးတည်း ရှိတာဆိုတော့ ကျွန်တော်လည်း တ,သသ လုပ်ရတာပေါ့။ လက်ထဲမှာ လိမ္မော်သီးလေး ကိုင်ရင်း လူမြင်အောင် ပြတာမျိုးတွေ၊ ဘာတွေတော့ အရင်တုန်းကလည်း
မရှိပါဘူး။ အဲ့ဒီတော့ ကျွန်တော့်လိမ္မော်သီးပျောက်တဲ့ ပြဿနာဟာ ကျွန်တော်တစ်ဦးတည်းရဲ့

ပြဿနာဖြစ်လာတယ်။

နောက်ပိုင်းတော့ ကျွန်တော်လည်း ဒီနေ့လိုဖြစ်လာတယ်ပေါ့ဗျာ။ အစကပြောထားသလို သွားလည်း ဒီလိမ္မော်သီး၊ စားလည်း ဒီလိမ္မော်သီးလိုမျိုး ဖြစ်လာတာ။ ကျွန်တော့် မျက်စိထဲ ကျွန်တော့် လိမ္မော်သီးပဲ မြင်ယောင်နေတယ်။ အိပ်ပျော်သွားရင်တောင် လိမ္မော်သီးပဲ အိပ်မက်နေတာဆိုတော့ ညဘက်တွေ၊ ဘာတွေများ ထယောင်မိ သလား တောင်မသိဘူး။ ဒါတော့ အိမ်က လူတွေပဲသိမှာ။ အဲတာကြောင့်လားမသိဘူး။ ဟိုတစ်နေ့က အိမ်ပြန်တော့ အမေက ပြောတယ်။ နင့် အတွက် လိမ္မော်သီးချန်ထားတယ်တဲ့။


ကြားစကတော့ ကျွန်တော်လည်း အူကြောင်ကြောင် ဖြစ်သွားတယ်။ ဘာလဲပေါ့။ နောက်မှ မစားတော့ဘူးဆိုပြီး ငြင်းလိုက်တယ်။ အမေလည်း ကျွန်တော်ကို ကြောင်တောင်တောင် ပြန်ကြည့်တယ်။ အေး..။ အဲတာဆို ငါစားလိုက်မယ် ဆိုပြီး  ပြောတယ်။ ကျွန်တော်လည်း စားလိုက်လေလို့ ပြောလိုက်တယ်။ျွန်တော်စာဖတ်နေတုန်း ကျွန်တော့်ရှေ့ထိုင်ခုံဘက်မှာ အမေက လိမ္မော်သီးထိုင်စားနေတယ်။ လိမ္မော်သီးအခွံက ထွက်လာတဲ့

 အနံ့ကလည်း တထောင်းထောင်းထနေတယ်။  အဲ့ဒီညက ကျွန်တော် အိပ်မက်ဆိုး မက်တော့တာပါပဲ။  

 

နောက်တစ်ခုက ကော်ဖီဆိုင်ထဲမှာ ဖြစ်တာ။ ကျွန်တော် ညနေဘက်ဆို ကော်ဖီဆိုင် သွားလေ့ရှိတယ်။ ထိုင်နေကျ ဆိုင်ဆိုတော့ စားပွဲထိုးကောင်လေးတွေနဲ့ ရင်းနှီးနေတယ်။ အဲ့ဒီနေ့က စားပွဲထိုးကောင်လေးက အစ်ကို ပုံမှန်ပဲလားလို့ မေးတယ်။ ကျွန်တော် နှုတ်က လိမ္မော်သီးလို့ ထွက်သွားလားမသိပါဘူး။ ခဏနေတော့ ရေနွေးတစ်အိုးနဲ့ ရေခဲတုံးလေးတွေ ထင်တားတဲ့ လိမ္မော်သီးစိတ်တစ်ပန်းကန်လာချပေးတယ်။ ငါမှာတာ ဒါမဟုတ်ပါဘူးဆိုတော့ အစ်ကိုပဲ လိမ္မော်သီးဆိုတဲ့။ ဟာ... မဟုတ်ပါဘူး ဆိုတော့။ ဟုတ်တယ် အစ်ကိုတဲ့။ ကျွန်တော်နားကြားမမှားဘူးတဲ့။ ကော်ဖီမှာတာကို လိမ္မော်သီးလာချတာ။


ပြဿနာရှာလိုက်ရင် စားပွဲထိုးပဲ ဒုက္ခရောက်မှာ။ လွှတ်ပစ်ရအောင်လည်း နှမြောစရာဆိုတော့ စားရတော့တာပေါ့။ အိမ်ပြန်သယ်သွားရင်လည်း သူဝယ်ပေးတာကျ မစားဘူးဆိုပြီး အမေကပြဿနာရှာမယ်။ နောက်ပြီး ကိုယ့်အခြေအနေ ကိုယ်ပဲ သိတယ်လေ။ ဆိုတော့ ကျွန်တော်လည်း ရေးနွေးသောက်လိုက်၊ ရေခဲတင်ထားတဲ့ လိမ္မော်သီးစိတ်တွေ စားလိုက်နဲ့ အောင့်သက်သက် နေလိုက်ရတယ်။ ဘေးနားဝန်းကျင်ကလူတွေ ကတော့ ကျွန်တော့်ကို ကြောင်နေပြီလို့ ထင်မှာပဲ။ သိပ်တော့ ဂရုစိုက်စရာမရှိပါဘူး။


ဒါတွေက ကျွန်တော်ရဲ့ လိမ္မော်သီးပြဿနာတချို့ပဲ။ ကျွန်တော်က မြို့ပြင်မှာနေတဲ့ ကောင်ဆိုတော့ မြို့ထဲရောက်တိုင်း ကျွန်တော့် လိမ္မော်သီးကို တွေ့မလားဆိုပြီး လိုက်ကြည့်မိတယ်။ မတွေ့နိုင်ဘူးဆိုတာ သိပေမယ့် စိတ်လိုရာ အဆင်ပြေအောင်ပေါ့။ ပုစွန်တောင်ဈေးတို့၊ ရေကျော်ဈေးတို့၊ ဘိုကလေးဈေးတို့၊  ၃၈ လမ်းဈေးတို့၊ ပန်းဆိုးတန်းတို့၊ ဆူးလေတို့၊ တရုတ်တန်းတို့၊မြေနီကုန်းတို့၊ လှည်းတန်းတို့၊ အင်းလျားလမ်းထဲက သစ်သီးတန်းတို့ ဘက်တွေ ရောက်ရင် ကျွန်တော့် လိမ္မော်သီးလေးများတွေ့မလားဆိုပြီး
လိုက်,လိုက် ကြည့်ဖူးတယ်။ ဘယ်တွေ့မလဲ။ အထမ်းသမားတွေနဲ့ သစ်သီးရောင်းတဲ့ အမျိုးသမီးတွေ၊ ကားအကြီးကြီးတွေပေါ်က ဆင်းလာတဲ့ လူကောင်ကြီးကြီးတွေ၊ မိန်းမငယ်သေးသေးလေးတွေနဲ့ မိန်းမ ၀၀ကြီးတွေပဲ တွေ့ရတာ။ ကျွန်တော့် လိမ္မော်သီးတော့ မတွေ့မိပါဘူး။


ကျွန်တော့်ရဲ့ လိမ္မော်သီးကို သတိတရရှိမှုဟာ ဘယ်အချိန်ထိ ရှိနေမယ်ဆိုတာ ပြောပြဖို့ ခက်ခဲပါတယ်။ ကျွန်တော်ကိုယ်တိုင်လည်း မသိပါဘူး။ ဒီကြားထဲကပဲ မနေ့တစ်နေ့  တုန်းက ကျွန်တော်ဟာ ကိုဆွေရဲ့ လိမ္မော်သီးတစ်လုံးကို ပြန်လည် ဖတ်ရှုမိခဲ့ပါတယ်။ ကျွန်တော့်ရဲ့ လိမ္မော်သီးနဲ့ ကိုဆွေ့ရဲ့လိမ္မော်သီး
ကွားခြားချက်တွေ အများကြီးရှိနေပေမယ့် လိမ္မော်သီးကို စွဲလန်းမှုကတော့ အတူတူပါပဲ။ ဒီလောက်ပါပဲ။ ကျွန်တော့် လိမ္မော်သီးကို သတိရနေတယ်ဆိုတာ။ ဒီအချိန်မှာတော့ ဒီလောက်ပဲရှိပါသေးတယ်။ ဒီထက်ပိုလာနိုင်စရာရှိသလားဆိုရင် ကျွန်တော်လည်း မပြောတတ်ပါဘူး။ ကျွန်တော်ကိုယ်တိုင် လိမ္မော်သီးတစ်လုံးဖြစ်သွားပြီးလားလို့တောင် ထင်မိပါတယ်။


ဘယ်အချိန်က လိမ္မော်သီးပေါ်တဲ့ အချိန် ဖြစ်နိုင်၊ မဖြစ်နိုင် ဆိုတာလည်း ကျွန်တော် အသေအချာ မပြောတတ်ဘူး။  လိမ္မော်သီးက ဘယ်အချိန်မှာ ပေါ်တာလဲဟင်။ ခင်ဗျားတို့လည်း အတိအကျပြောတတ်မှာ မဟုတ်ဘူး။ လိမ္မော်သီးမှာ လိမ္မော်ရောင်ရှိတာတော့ ခင်ဗျားတို့ မသိလည်း ကျွန်တော်သိပါတယ်။



အပေါ်မှာ ကျွန်တော် ရေးထားခဲ့သလို ဇာတ်လမ်းမျိုးကို စာရေးဆရာအစုံကလည်း ပုံစံမျိုးစုံနဲ့ ရေးထားခဲ့ပြီးပါပြီ။ သူတို့ဇာတ်လမ်းတွေက ဇာတ်သိမ်းပိုင်းရောက်သွားရင် လွမ်းတာတွေ၊ သတိရတာတွေ အလိုလိုပျောက်သွားပြီး အပျော်နဲ့ ဇာတ်သိမ်းသွားကြရော။ ကျွန်တော်လည်း နောက်ပိုင်းကျ ပျော်ရမယ်ထင်တာမို့ အခုလို ရေးထားကြည့်တာ။ ဘာပဲဖြစ်ဖြစ် တကယ်ပါ။ ကျွန်တော့် လိမ္မော်သီးကို ကျွန်တော် သတိရနေပါတယ်။

အခုလောလောဆယ်မှာတော့ စေဇန်းရဲ့ ပန်းချီကားတွေထဲမှာ ကျွန်တော့်ရဲ့ လိမ္မော်သီးတွေ့မလားလို့ လိုက်ရှာနေတယ်။

 

 

တောကျောင်းဆရာ