Star InactiveStar InactiveStar InactiveStar InactiveStar Inactive
 

 

 ထလ

သြဂုတ်လဆန်းပိုင်းတွင်... မနက်စာစားပြီး ကျနော်တို့အားလုံးကို ခေါ်ထုတ်ကာ စောင်အုပ်ပြီး ရုံးခန်းရှေ့တွင် ထိုင်ခိုင်းထားသည်။ နာမည်တော်တော်များများ ခေါ်သံကြား၍ထဟုဆိုကာခေါ်သွားသည်။ လူ (၃၀)ကျော်ခန့် ခေါ်သံကြားအပြီးတွင် ကျနော့်နာမည်ခေါ်သည်။ စောင်အုပ်လျက်မှ ဆွဲခေါ်ရာသို့ အတော်ကြာကြာလိုက်ပါသွားရသည်။ ကျနော့်ရှေ့မှခြေထောက်များကိုလည်းတွေ့ရသည်။ စောင်ဖွင့်လိုက်သည့်အခါ တိုက်ခန်းရှည်ကြီးတခုရှေ့ရောက်နေသည်။ သံတံခါးဖွင့်ပေးပြီး တိုက်ခန်းထဲသို့ ကျနော်ဝင်လိုက်တော့ အခန်းထဲမှာ နှစ်ယောက်ရှိနေသည်။ အခန်းမှာ ၈' ခန့်ကျယ်ပြီး ၁၂' ခန့်ရှည်သည်။ ယခင်က သမံတလင်းခင်းထားသော်လည်း ယခုကွာပြီး မြေသားများပေါ်နေသည်။ ကြွက်တွင်းများလည်း အများအပြားတွေ့ရသည်။တဖက်နံရံတွင် ၂' x ၆' ခန့်သစ်သား ပျဉ်ချပ်ရှည်တခုခင်းထားသည်။ နံရံအင်္ဂတေများ လန်ကာ မဲညစ်နေသည်။ အခန်းထောင့်တွင် အညစ်အကြေးသွားရန် ဂန်ဖလားဟုခေါ်သော စဥ့်အင်တုံ နှစ်လုံးရှိသည်။ စုတ်ပြဲနေသော ဖျာကြမ်းဟောင်းတချပ်ကို လိပ်ကာ ထောင်ထားသည်။ ၎င်းမှာ ညတွင်ခင်းအိပ်နိုင်ရန်ဖြစ်သည်။ ညစ်ပတ်သောအခန်းအခြေအနေကိုကြည့်၍ ကျနော်အတော်စိတ်ပျက်သွားမိသည်။ တိုက်သစ်မှာ ဤအခန်းနှင့်စာလျင် များစွာသန့်ရှင်းသည်ဟုဆိုရပေမည်။ အဝင်သံတံခါးမကြီးဘေးတွင် ဆီးသွားရန် စဉ့်အိုးကြီးတလုံးချထားသည်။ မတ်တပ်ရပ်၍ သံတိုင်ကြားမှဆီးသွားရသည်။ ကျင်ကြီးသွားလိုလျင် ဖျာစများကိုချိုး၍ဖြစ်စေ၊ မိမိအဝတ်စကိုဖြဲ၍ဖြစ်စေသုံးရသည်။

                             အခန်းထဲမှာ ညဆိုလျင် (၆၀) ၀ပ်တ် မီးလုံးရှိသည်။ ဤမီးလုံးသည် ကျနော်တို့အတွက် မီးခြစ်လည်း ဖြစ်ပါသည်။ မီးလုံးရှိရာသို့ လူနှစ်ယောက်ဆင့်တက်ပြီး ရေစွပ်ထားသော စွပ်ကျယ်စကို မီးလုံးတွင်ကပ်ထားရသည်။ ခဏကြာလျင်ညှော်နံ့ထွက်၍ စွပ်ကြယ်စ မီးစွဲလျင် လွှတ်ချပြီး ပါးစပ်ဖြင့် မီးမသေအောင်မှုတ်ကာ ဆေးလိပ်မီးညှိရသည်။ ဤတိုက်တွင်ကောင်းသည့်အချက်မှာ တခန်းနှင့်တခန်းစကားလှမ်းပြော၍ရခြင်းနှင့်ရေချိုးထွက်ချိန်တွင် တခန်းနှင့်တခန်းတွေ့ရခြင်းပင်ဖြစ်သည်။ အခန်းများ၏ရှေ့တွင်တိုက်ဝင်း အုတ်တံတိုင်းရှိပြီး၊ နှစ်ပရိစ္ဆေဒကြာပြီဖြစ်သဖြင့် ညိုပုတ်ပုတ်ဖြစ်နေသည်။ အလယ်ခေါင်လောက်တွင် အဝင်အထွက်သွပ်ပြားတံခါးရှိသည်။ ထောင့်တနေရာတွင် သွပ်ပြားကာထားသည့် အုတ်ရေကန်ရှိသည်။ ရေကန်သို့ တခန်းစီရေချိုးထွက်ချိန်တွင် တယောက်နှင့်တယောက်မြင်ရသည်။ စောင့်သည့်အပြာဝတ် အကျဉ်းသားကောင်းလျင်၊ အခန်းများသို့ပြေးနှုတ်ဆက်ခွင့်ရသည်။ ဤတိုက်မှာ အမှတ် (၄) တိုက်ဖြစ်ပြီး အခန်းပေါင်း (၂၅) ခန်းရှိကာ ကျနော်တို့ဘက်မှ (၁၀)ခန်းကို ကန့်ထားပြီး ၄ (တို)ဟုခေါ်သည်။ တဖက် (၁၅)ခန်းကို ၄ (ရှည်) ဟုခေါ်သည်။ မျက်နှာခြင်းဆိုင်တွင် သစ်သားကြမ်းခင်းရှိသည့် အမှတ် (၅) တိုက်ရှိသည်။ ၅ တိုက် နံဘေးတွင် ကြိုးစင်ရှိသည်။ ဤ (၄) တိုက် (၅) တိုက်တို့မှာ အင်္ဂလိပ်ခေတ်က ကြိုးတိုက်များဖြစ်သည်။ ကြိုးသမားကို တရက်တခန်းရွှေ့ကာ နောက်ဆုံးညတွင် ကြိုးစင်နံဘေးအခန်း၌ထားသည်ဟုသိရ၏။

                             ကျနော့်အခန်းတွင် ရေကျော်မှ အလုပ်သမားလူငယ် အုန်းသွင် နှင့် စန်းမြင့် ဆိုသည့် မြန်မာစာအဓိကဖြင့် ဘွဲ့ရထားသူသုံးဘီးသမားရှိသည်။ ကျနော်တို့မှာ တယောက်အကြောင်းတယောက်သေချမသိသဖြင့် သိပ်မပြောကြ။ ကျနော်က မန္တလေးတက္ကသိုလ် သပိတ်နှင့်အဖမ်းခံရကြောင်း ပြောပြကာ အုန်းသွင်က Study Group တခုတွင်ပါဝင်သောကြောင့်အဖမ်းခံသည်ဟုဆို၏။ စန်းမြင့်က တပ်ပြေးတယောက်ကိုကျောင်းသားကဒ် ငှါးမိ၍ ပြဿနာတက်ရခြင်းဖြစ်သည်ဟုပြောပြ၏။ နီယု နှင့် သန်းဌေးမှာ ၄(ရှည်) တွင် ရှိပြီး ကိုမုတ်ဆိတ်မှာ ၄ (တို) ဘက်တွင်ရှိကြောင်း သိရသည်။ နောင် ကျနော်တို့အမှု ရုံးထုတ်သောအခါ အုန်းသွင်သည် ကျနော်တို့ အမှုတွဲဖြစ်နေပြီး R.I.T ကျောင်းသားများ တောခိုလိုလျင် ကျနော်ကလွတ်မြောက်ဒေသသို့ ပို့ပေးကြောင်းတခါမျှမမြင်ဘူးသော ကျနော့်ကို အစိုးရသက်သေအဖြစ်ထွက်ဆိုသည်။ သန်းဌေးနှင့်ကိုမုတ်ဆိတ်လည်း လွတ်သွားသည်။ ကိုမုတ်ဆိတ်မှာ ကျနော့်ကို အတော်ခင်သည်။ တိုက်သစ်မှာနေစဉ်က ည ညဆိုလျင် ကျနော်ပြောပြသော မွန်တီခရစ္စတိုမြို့စားကြီးနှင့်သူရဲကောင်း (၃)ယောက် ဇာတ်လမ်းများကို အလွန်နှစ်ခြိုက်သည်။ ကျနော်စစ်ကြောရေးမှ ပြန်လာလျင် သားရေပတ်ဖြင့် ရိုက်ခံရသော ကျောမှဒဏ်ရာများကို ကြင်နာစွာ ပရုတ်ဆီလူးပေးလေ့ရှိသည်။ လက်သည်း ရှည်လျင်ဇောင်းထက်အောင်သွေးထားသည့် ဖန်ပုလင်းကွဲဖြင့် လက်သည်းဖြတ်ရရာ၊ ကျနော်က မဖြတ်တတ်သဖြင့် ကိုမုတ်ဆိတ်က အကိုကြီးတယောက်ပမာ ဖြတ်ပေးလေ့ရှိ၏။ သူ့တွင် အိမ်ထောင်နှင့်ခလေး (၂)ဦးရှိသည်။

                             သူနှင့်ကိုတင်မောင်ဦး၊ ကိုမြင့်ဦးတို့ မှိုင်းရာပြည့်ကိစ္စ အုပ်ကျင်း အိမ်တအိမ်တွင် ဆွေးနွေးနေစဉ် ထောက်လှမ်းရေးများက ဝင်ဖမ်းကြခြင်းဖြစ်သည်ဟုဆိုသည်။ မီးပျက်သောညဆိုလျင် တွင်းထဲမှ ကြွက်များက ကျနော်တို့ကိုထွက်ကိုက်တတ်သည်။ ထို့ကြောင့် ကြွက်နှိမ်နှင်းရေးလုပ်ရသည်။ ညနေစောင်းကတည်းက ကြွက်တွင်းများ အနီးသို့ တမင်းများကြဲပက်ထားပြီး သံတိုင်ပေါက်ကို ဖျာစုတ်ဖြင့်ပိတ်ကာ မီးလုံးကို နှစ်ယောက်ဆင့် တက်ဖြုတ်၍ ငြိမ်းရသည်။ မီးမှောင်သဖြင့် ထမင်းလုံးထွက်ဆွဲသော ကြွက်များကို ဖိနပ်များဖြင့် တဖုံးဖုံးရိုက်ကြသည်။ မနက်ကြလျင် ကြွက်သေများကို အပြာများထံမှ ဆေးလိပ်နှင့်လဲကြသည်။ ကြွက်၎၊၅ကောင်မှ ဆေးလိပ် တလိပ် နှစ်လိပ်သာပေးသည်။ တခါတရံ ပဲဟင်းမှ အပေါ်ဆီရလျင် အပ်ထားပြီး ကြွက်ရိုက်ကာ ဓါးလုပ်ထားသော သံပြားစဖြင့် တုံးတင်ပြီး သောက်ရေကြွေခွက်ထဲထည့် ချက်ကြသည်။ လောင်စာမှာ ဆေးလိပ်တို ဖျာစများ နှင့် ရှားရှားပါးပါး ပလစ်စတစ်များဖြင့် ပွက်ရုံချက်စားကြသည်။ ငံပြာရည်ထည့်၍ အငတ်ငတ် အပြတ်ပြတ်ဖြင့် စားကောင်းလှသည်။

                             ညနေစောင်း ထောင်ပိတ်ချိန်ရောက်၍ အပြာ များ ပြန်လျင် ကျနော့်တို့ လွတ်လပ်ပြီး သူတို့သည် အိတ်ဆောင်များသို့ ပြန်အိပ်ကြရသည်။ ညပိုင်းဆိုလျင် ဝါဒါများသာရှိပြီး သူတို့ကလည်း တိုက်ဝင်းတွင်းသို့ ဝင်လာလေ့မရှိပါ။ ထို့ကြောင့် ညဆိုလျင် တခန်း နှင့် တခန်း စကားအော်ပြောကြ သတင်းဖလှယ်ကြသည်။ ကျနော်တို့၏ သတင်းကြေငြာသူများ ရန်ကုန်တက္ကသိုလ်မှ သင်္ချာ အဓိကကျောင်းသား ရောဘတ်စန်းအောင်ဖြစ်သည်။ သူ့အခန်းက အလည်လောက်မှာရှိသည်။ ၁၉၇၄ ဦးသန့် အရေးအခင်းတွင် ဦးသန့်ရုပ်ကလာပ်ကို ကြက်ခြေနီများလက်မှ လု၍ သံဃာတော်များထံလွှဲပြောင်းပေးရာတွင် ပါဝင်ခဲ့သူဖြစ်သည်။ ထိုအရေးအခင်းတွင် သူထောင်မကျဘဲပြန်လွတ်လာသည်။ ၇၅ ဇွန် တွင် အဖမ်းခံရပြန်သည်။ ထောင်မကျဘဲ ပြန်လွတ်သည်။ ယခု မှိုင်းရာပြည့်တွင်လည်း ကြိုတင်ဖမ်းထားခြင်းခံရသည်။ သူသည် ယခုအခါ အင်းစိန်ထောင်တွင် နိုင်ငံရေး အကျဉ်းသားတဦးအဖြစ် ထောင်ဒဏ် (၁၄) နှစ်ကျခံနေရသည်။

                           မ.ဆ.လ အစိုးရသည် နုနယ်ငယ်ရွယ်သောကျောင်းသားများကို ပြင်းထန်သော နှစ်ရှည်ထောင်ဒဏ်များ ရက်ရက်စက်စက် ချသည်။

                             သြဂုတ်လ လည်လောက်တွင် ကျောင်းသားများကို စစ်ခုံရုံးတင်ကာ အသုတ်လိုက် ထောင်ချသည်။ "ပုံစံကေ" ဟုခေါ်သည့် ရှေ့ ၁" နောက်ပြောင် ဆံပင်ပုံစံ (ကမ္ဘာ့ ဖလားပွဲမှ Ronaldo ၏ ဆံပင်ပုံစံ) ညှပ်ပြီဆိုလျင် သေချာပြီ နောက်ရက်ထောင်ကျတော့မည်။ ထောင်ကျပြီး အချို့လည်း တိုက်ပြန်ရောက်လာသည်။ အများစုမှာ အဆောင်သို့ရောက်သွားကြသည်။ ထိုအချိန်က အချုပ်ဆောင်နှစ်ဆောင်နှင့် အကျဆောင် (၃) ဆောင်ရှိသည့်အနက်၊ အကျဆောင်ဖြစ်သော အဆောင် (၃) တွင် နိုင်ငံရေးအကျဉ်းသားများကို သီးခြားထားသည်။ ည (၇) နာရီ သံချောင်းခေါက်လျင် ရောဘတ်က သတင်းကြေငြာသည်။ ဘယ်သပိတ်မှ ဘယ်သူ ဘယ်နှနှစ်ကျသွားပြီ၊ ဘယ်သူတွေထောင်ကျပြီး အဆောင်ရောက်သွားပြီ၊ ထောင်ကျပြီး ဘယ်သူက (၅)တိုက်မှာ၊ သူက သတင်းကြေငြာသည်။ မှိုင်းရာပြည့်ကျောင်းသား ခေါင်းဆောင်များဖြစ်ကြသော ကိုမှိုင်း (တင်အေးကြူ) ဝင်းမင်းထွေး၊ ကိုသန်းလင်း တို့ထောင် (၉)နှစ်စီကျသွားသည်။ အများဆုံးက သေဒဏ်ကျသော ကိုတင်မောင်ဦး၊ ကိုမြင့်ဦး က ထောင် (၁၄) နှစ်၊ သပိတ်များတွင် ခေါင်းဆောင် (၉) နှစ် အလည်အလတ် (၇) နှစ်၊ ချီတက်လျင် (၅) နှစ်ကျကြသည်။ နီယုက ထောင်ဒဏ် (၅) နှစ်ကျသည်။တကယ်တော့ သူသည် ထောက်လှမ်းရေး တပ်ကြပ်ဖြစ်သည်။ ကိုတင်မောင်ဦး၊ ထိုင်းမှ သူ့အိမ်ကို ဝပ်ကျင်းအဖြစ်သုံးလေ့ရှိ၏။ ၁၉၇၅ ဇွန် သပိတ်တွင် ကိုတင်မောင်ဦး  ပြန်သွားပြီး ထောက်လှမ်းရေးက သူ့ကိုပြန်ခြေရာခံမိကာ ၆ လခန့်သူ့ကို ထိန်းသိမ်းထားသည်။ နောက် အပေးအယူလုပ်ကာ ပြန်လွှတ်လိုက်သည်။ ၉၇၆ မှိုင်းရာပြည့် မတိုင်မီ ကိုတင်မောင်ဦး သူ့အိမ်လာသည့်အခါ သူကထောက်လှမ်းရေးသို့ သတင်းပေးလိုက်ခြင်းပင်ဖြစ်သည်။ သို့ရာတွင် သူသည် ကိုတင်မောင်ဦး ကို နစ်နစ်နာနာဖြစ်စေရန်တော့ ရည်ရွယ်ပုံမရပေ။ အတင်းအကျပ်ကိုင်ခံရသည့်အတွက် မလွှဲမရှောင်သာလုပ်ခဲ့ရခြင်းဖြစ်ဟန်တူသည်။ တနေ့ ရေချိုးထွက်ရင်း သူ ကျနော့်ကို ပြေးလာ နှုတ်ဆက်သည့်အခါ ကျွန်တော်က ကိုတင်မောင်ဦး ကို ဇွန် (၂၇) ရက်နေ့က ကြိုးပေးလိုက်ပြီဟုကြားရကြောင်း ပြောပြသည့်အခါ တမျက်နှာလုံးေ သွေးဆုတ်ဖြူရော်သွားပြီး "မဖြစ်နိုင်ပါဘူးကွာ ဘယ်နည်းနဲ့မှမဖြစ်နိုင်ပါဘူး" ဟု အထိတ်တလန့်ငြင်းသည်။ ကျနော်တို့ တိုက်တွင် ကိုတင်မောင်ဦး၏ အဖေ ဦးလှရွှေရှိသည်။ အဖေ အဖေ၊ ညီ ညီမ များ အားလုံး အရွယ်မရောက်သေးသည့် ခလေးနှစ်ဦး အပ အားလုံး အဖမ်းခံရပြီး ထောင်ကျသည်။

                             တိုက်စည်းကမ်းအရ တခန်းနှင့်တခန်း စကားမပြောရ၊ လေမချွန်ရ၊ သီချင်းမဆိုရ၊ နံရံမခေါက်ရ အမိန့်ထုတ်ထားသည်။ မိလျင် စောင်အုပ်ကာ ဝိုင်းရိုက်ခံရသည်။ "အပြာ" ဟုခေါ်သည့် လုံချည်အပြာဝတ် အကျဉ်းသားများက ကျနော့်တို့ ၏ ဝေယျာဝစ္စလုပ်ပေးရသည်။ သူတို့သည် ထောင်တွင် အနေကြာသဖြင့် "ထောင်စိတ်" ပေါက်ကာ ကြီးနိုင်ငယ်ညှဉ်းလုပ်လေ့ရှိသည်။ ကျနော်တို့အပေါ်တွင် အချုပ်ဘဝဖြစ်၍ ထောင်ပါးမဝသေးသောကြောင့် အနိုင့်ကျင့်ချင်သည်။ တိုက်တွင်ကျသည့် အပြာများသည် အဆိုးဆုံးမှာ ကျောင်းဝင်းစိန်ဖြစ်သည်။ သူသည် ဖျာပုံခရိုင်ဘက်မှဖြစ်ပြီး ဇနီးဖြစ်သူကို ဓါးဖြင့်ခုတ်သတ်မှုဖြင့် ထောင်(၇) နှစ်ကျနေသူဖြစ်သည်။ စိတ်လည်းသိပ်မမှန်ပေ။ ကျနော်တို့ တခန်းနှင့်တခန်း စကားပြောလျင် ချောင်းဖမ်း၍ရုံးတင်သည်။ သူ့တာဝန်က ကျနော့်တို့အခန်းများမှ အညစ်အကြေးများကို တံခါးသော့ဖွင့်ပြီး ပုံးများထဲသွန်ထည့်စေကာသယ်ရသည်။ ကျနော်တို့အားလုံးက သူ့ကို မုန်းသဖြင့် "ဂန်ဖလား" ထွက်သွန်လျင် မတော်တဆလိုလို၊ မနိုင်သလိုနှင့် သူ့လက်ပေါ်သွန်ချသည်။ သူကရိုက်သည်။ ကျနော်တို့က အရိုက်အနှက်ခံပြီး သူ့ကို ဒုက္ခပေးသည်။ ထမင်းဝေလျင် သူမတည့်သူဆိုလျင် ဝအောင်မပေး၊ ထမင်းပို၍သွန်တာတွေ့လျင်လည်း ထုတ်ရိုက်တတ်သည်။ သံပန်းကန်ပြားထဲ ထမ်းထည့်ပြီး ပန်းကန်ပြားနှစ်ချပ် မျက်နှာအပ်ကာ သံတိုင်များကြားမှ ထိုးသွင်းပေးသည်။ ထိုထမင်းကို အခွက်ကလေးဖြစ်အောင် ယက်ဖယ်၍ ပဲဟင်းထည့်ရသည်။ ပဲဟင်းကို သံပုံးများဖြင့် သယ်လာပြီး နို့ဆီဘူးကိုလက်ကိုင်တတ်ကာ သံတိုင်များကြားမှ လောင်းထည့်ပေးသည်။ သူနှင့်မတည့်လျင် အပေါ်ရေသာ ခပ်ပေးပြီး သူနှင့်ပြေလည်လျင် ပုံးထဲမွှေကာ အဖတ်ပါအောင်ထည့်ပေးသည်။ ကျနော်တို့သည် ငပိစမ်းများကိုရေနှင့်ဖျော်၍ စွပ်ကျယ် အကျီင်္ဖြင့်ထုတ်ပြီး ဒေါင့်မှ အပေါက်တွင် ဖျာစများထိုး၍ချိတ်ပြီး ငံပြာရေစစ်ကြသည်။ ငံပြာရေက ငပိထက်ထမင်းစားမြိန်သည်။ သို့နှင့်ပင် ကျနော် ဆံပင်ညှပ်ရက်ရောက်လာသည်။ ကျန်ရစ်သည့် ရဲဘော်များက အားပေးကြသည်။ နောက်နေ့ မနက်စောစော ရေချိုးထုတ်သည်။ ထမင်းကျွေးသည်။ မကြာမီရုံးထုတ်တော့မည်။ ကျနော်က ငပိ၊ ရေနှင့်အုတ်နီမှုံ့တို့ကို ဖျော်ပြီး ဖျာစကို အဝတ်ပတ်၍ တိုက်ခန်းနံရံတွင် "အောင်ပွဲဟာတိုက်ရဲသူအတွက်ဖြစ်တယ်" ဟူသည့် စာတမ်းကိုရေးကာ အခန်းလေးကိုနှုတ်ဆက်ခဲ့သည်။ ဟော သော့ခလောက်ဖွင့်သံ ၊ နာမည်ခေါ်သံများကြားရပြီး။

[ကျသစ်ဘဝ]

          ထောင်ကျပြီး ကျနော်တို့အားလုံး နိုင်ငံရေး အကျဉ်းသားများစုဝေးထားရာ (၃) ဆောင်သို့ရောက်သွားသည်။ ကျနော်တို့ အမှုတွဲ (၉) ယောက် အနက် ဇော်သန်းစိန်မှအပ  ကျန် (၈) ယောက်လုံး (၃)ဆောင် အောက် (၂) ဟုခေါ်သည့် အခန်းရှည်ကြီးထဲမှာ အတူနေရသည်။ R.I.T ကျောင်းသား တင်သိန်းလွင် (နောင်-ဗကပတောခို)၊ R.I.T ငြိမ်းဝင်း (နောင်- ဗကပ တောခို)၊ ရန်ကုန်တက္ကသိုလ် ကျောင်းသား ဝင်းထွန်း (ယခုကွယ်လွန်) ၊ တင်ထွဋ် (ကဗျာဆရာပန်းထွေး)၊ တင်ဝင်းမောင် (အလုပ်သမား)၊ လှဦး (အလုပ်သမား)၊ ကိုခင်မောင်သန်း (လမ်းစဉ်လူငယ်-မန္တလေးကွယ်လွန်) နှင့် ကျနော်ဖြစ်ပါသည်။ အဆောင်မှာ နှစ်ထပ်ဖြစ်ပြီး အောက် (၄)ခန်း အပေါ် (၄) ခန်းရှိသည်။ အင်္ဂလိပ်ခေတ် နှစ်ထပ်အုတ်တိုက်နီကြီးဖြစ်သည်။ ၅' ပေခန့် လူသွားလမ်း ချန်ထားပြီး ၊ ၆' x ၂ ' သစ်သားတန်းများရိုက်ပြီး အခန်းဖွဲ့ထားသည်။ တခန်းလျင် ၂၂' x ၈၀' ခန့်ကျယ်ဝန်းသည်။ သစ်သားပြားခင်းကာ သံခြေထောက်တင်ထားသည့် ကုတင်များရှိသည်။ အိမ်သာမှာအခန်းထောင့်တွင်ရှိပြီး သုံးထပ်သားပြားကာထားသည်။ သံစည်ပိုင်းပြတ်ပေါ်တွင် အသားပြားတင်ထားသဖြင့် သန့်ရှင်း သပ်ယပ်သည်။ ပေရှစ်ဆယ်ခန့်ရှည်လျားသဖြင့် လမ်းကောင်းကောင်းလျောက်၍ရသည်။ ကျနော်တို့ (၈) ဦးမှာ အတူတူစားကြသည်။ ထောင်အခေါ် စားအိုးတွဲများဖြစ်သည်။ တဖက်ခန်းရှိ ဇွန် (၇၅) သပိတ်နှင့်ထောင်ကျနေသည့် ကိုခင်မောင်လင်းဆိုသည့် ဘွဲ့ရ ကျောင်းသားက ကျနော့်ကို ဆက်သွယ်သည်။ သူသည် ကျနော့်ဇာတိ ရေဦးမှဖြစ်ပြီး နောင်တွင် ပြည်ထဲရေး ဝန်ကြီးဖြစ်လာသည့် ဦးဘိုနီ၏ တူအရင်းဖြစ်သည်။ (နောင်တွင် ကိုခင်မောင်လင်းသည် B.C.Pသို့တောခိုသွားခဲ့ပါသည်။)

ကျနော့်မိဘများက၊ သူ့မိဘအိမ်သို့လာရောက်ဆက်သွယ်ပြီး စားစရာများ ပေးထားကြောင်း ထောင်ဝင်စာတွေ့ခွင့်ရသည်နှင့်လာတွေ့ကြမည်ဖြစ်ကြောင်း ပြောပြသဖြင့် ကျနော်ရင်နင့်သွားမိသည်။ မိဘမေတ္တာ...။ ထိုစဉ်က ကျနော်၏ ဖခင်မှာ ပြည် နဝင်းဆည်တွင် အင်ဂျင်နီယာတဦးအဖြစ် အမှုထမ်းနေသဖြင့် ဖခင်နှင့် မိခင်မှာ ပြည်တွင်ရှိသည်။ ညီလေးက မန္တလေးထောင်တွင်ရှိနေသည်။ အမေ့ခမျာ မန္တလေးရှိ ညီလေးကို ထောင်ဝင်စာသွားတွေ့ကာ အပြန်တွင် အင်းစိန်ဝင်၍ ကျနော့်ကို ထောင်ဝင်စာတွေ့ရသည်။ အမေသည် သူ့ဘဝတလျောက်လုံး ကွယ်လွန်ခါနီးအချိန်ထိ ကျနော့်ကို ထောင်ဝင်စာတွေ့သွားခဲ့ရှာသည်။

                             ကျနော့်တို့အခန်းထဲတွင် နိုင်ငံတော် ပုန်ကန်မှုဖြင့် ထောင်ဒဏ်တသက်တကျွန်းကျနေသော ရန်ကုန်တက္ကသိုလ်ကျောင်းသား ကိုထွန်းအောင်ကျော်၊ ကိုရဲမြင့်သိန်း နှင့် သူတို့ အမှုတွဲ ကိုထွန်းကြင် ရှိသည်။ ကိုထွန်းအောင်ကျော်သည် ၈၈ အရေးအခင်း အပြီး ထိုင်းနယ်စပ်သို့ ရောက်ရှိသွားကာ A.B.S.D.F ၏ ကျောင်းသား ဥက္ကဌဖြစ်လာသည်။ ကိုရဲမြင့်သိန်းမှာ ယခု M.P.P ရဲမြင့်အမည်ဖြင့် ထင်ရှားသော ပန်းချီဆရာ တစ်ယောက်ဖြစ်နေပါသည်။ ၁၉၇၄ အလုပ်သမားသပိတ်ကြီးမှ ဂုံနီစက်ရုံ အလုပ်သမားကြီး ဦးချစ်ထွန်းရှိသည်။ သူကထောင်ဒဏ် (၁၅) နှစ်ကျသည်။ နောက်အလုပ်သမား တဦးမှာ ထောင်ထဲတွင် အာဏာပိုင်များ၏ သတင်းပေးလုပ်နေသူဖြစ်သည်။ သူက ကျနော်တို့ကို မကြာခဏ လာ၍ အကဲခတ်သည်။ ပဲခူးရိုးမ B.C.P တိုက်တိုင်းအောင်တပ်ခွဲ (၂)မှ ဖမ်းမိသော ရဲဘော်ခင်ညိုဟူသည့် ကရင်တရုတ်ကပြားတယောက်ရှိသည်။ သူက မတရား သင်းပုဒ်မဖြင့် ထောင် (၂) နှစ်ကျသည်။ ရန်ကုန် ဝှါကျုံး တရုတ်ကျောင်းထွက်ဖြစ်သည်။ ကျနော်တို့နှင့်အတူ ရန်ကုန်တက္ကသိုလ် သပိတ်မှောက်ကျောင်းသားဖြစ်သည့် ကဗျာဆရာ "ဇေငြိမ့်" ခေါ် ရဲကျော်သူနှင့် ပုသိမ်မှ ရဲဌေး ရှိသည်။ ရဲကျော်သူ၏ အဖေမှာ ဗိုလ်ချုပ်အောင်ဆန်းတို့နှင့် ကျောင်းနေဖက်ဖြစ်ပြီး။ ထိုခေတ်က နယ်ချဲ့ ဆန့်ကျင်ရေးကျောင်းသားလှုပ်ရှားမှုများတွင် ထင်ရှားသည့် ဦးလှမြတ်စိုးဖြစ်သည်။ 

                             ကျွန်တော်တို့၏အဆောင်မှူးမှာ ထောက်လှမ်းရေး အကူတပ်ဖွဲ့မှ တပ်ကြပ်ကြီး လှရွှေဖြစ်သည်။ သူသည် အလွန်ပါးနပ်ကောက်ကျစ်သည်။ အဆောင်မှ အခန်းများထဲတွင် ဒလံ များထည့်ထားပြီး လှုပ်ရှားမှုများကို စောင့်ကြည့်သည်။ ကျနော်တို့နှင့် တဆောင်တည်းတွင် ရှေ့နေဦးရဲထွန်း နှင့် ဖ.ဆ.ပ.လ ခေါင်းဆောင်ဦးကျော်ငြိမ်းတို့ရှိသည်။ သူတို့ (၃) ဦးသည် ဦးသန့်အရေးအခင်း နှင့် ထောင် (၇) နှစ်စီကျနေကြသည်။

                             ပထမဆုံးထောင်ဝင်စာတွေ့ရသည့်အခါ သံဇကာ နှစ်ထပ်ကာထားသည့် အခန်းငယ်တခုအတွင်းတွေ့ရသည်။ အဖေနှင့်အမေလာတွေ့ကြသည်။ တခန်းလုံး ဟိုဘက်သည်ဘက်ငိုသံများဖုံးနေသည်။ အဖေက ကျနော်ထောင်(၇) နှစ် ကျကြောင်းသိသွားသည့်အခါ ခေါင်းငိုက်စိုက်ကျသွားသည်။ အမေကမူ မျက်နှာထား တင်းတင်းဖြင့် မင်းမိန်းမနဲ့ခလေးနေကောင်းတယ်၊ ဘာမှစိတ်မပူနဲ့ ငါတို့စောင့်ရှောက်ထားတယ်ကြားလားဟု ပြောသည်။ အမေက စိတ်ဓါတ်ကြံ့ခိုင်သည်။ ကျနော့်သမီးလေးမှာ ကျနော်ပျောက်သွားသဖြင့် လွမ်းဖျားဖျားရှာကြောင်းသိရသဖြင့် စိတ်မကောင်း အမေသည် ကျနော့်ကို အင်းစိန် နှင့် မန္တလေးထောင်တို့တွင် ထောင်ဝင်စာ တွေ့သွားခဲ့ရှာသည်။ အမေအသက်ကြီးလာ၍ ရင်သားကင်ဆာဖြစ်သဖြင့် Radio Therapy နည်းဖြင့်ကုသရသောကြောင့် ဆံပင်များ ကျွတ်ကာ ကတုံးတုံးထားရချိန်ထိ ကျနော့်ကို ထောင်ဝင်စာတွေ့သွားခဲ့ရှာပါသည်။

“ဘယ်သူလာလာ မလာလာ ငါလာတွေ့မယ်.. ငါ့ရင်နဲ့လွယ်ပြီး မွေးခဲ့တဲ့သားကို .. ငါသေသွားရင်တောင်မှ အရိုးထဲက ဝိဥာဉ်အဖြစ်ထလာပြီး လာတွေ့လှည့်မယ်”  ဟုပြောသွားသော အမေ့စကားများမှာ ကျနော့် အသွေးအသား၊ ကျနော့် ဟဒယထဲတွင် ယခုအချိန်ထိပဲ့တင်နေပါသေးသည်။

                             အဆောင်မှာနေသားကျ၍ တလ အတွင်း အယူအဆတူသူချင်း အချင်းချင်း ချိတ်ဆက်မိလာသည်။ ကျနော်တို့ အပေါ်ထပ်တွင် (၇၅.ဇွန် အရေးအခင်းမှ ကျောင်းသားလူငယ်လေးများရှိသည်။ သူတို့သည်လည်း မော်စီတုံး အတွေးအခေါ် လက်ခံသူများဖြစ်ကြပါသည်။ သူတို့အထဲမှ စံနု၊ မိုးမြင့်၊ ခင်ဇော်လင်း နှင့် ဝင်းဆွေတို့မှာ နောင်တွင် B.C.P သို့တောခိုသွားခဲ့ကြပါသည်။ မိုးမြင့်မှာ တောခိုရာမှပြန်မိပြီး .. ၈၈ တွင် ပြည်သူတိုးတက်ရေးပါတီ၏ အမှုဆောင်တစ်ယောက်ဖြစ်လာသည်။ သူတို့ထံတွင် မော်လက်ရွေးစင်ကျမ်းများရှိသည်။ သူတို့က ကျနော့်တို့ အပေါ်ထပ်မှ ဖြစ်သဖြင့် ည အားလျင် အခင်းပျဉ်ကို ခွါထားသော အပေါက်မှ ကျနော့်တို့ကို ဆက်သွယ်သည်။ စာအုပ်များချပေးသည်။ ကျနော်တို့က စောင်များကို ခြင်ထောင်သဖွယ်ချုပ်ကာ အခန်းထဲမှ သတင်းပေး မသိအောင် ကင်းချ၍ လေ့လာကြရသည်။ B.C.P မှရဲဘော် ခင်ညိုက ကျနော်တို့သည် B.C.P ထောက်ခံသော ကျောင်းသားများဖြစ်သည်ကို သိလာသောအခါ ကျနော့်ကို ရွေးချယ်ဆက်သွယ်ပြီး၊ ညကြလျင် အိမ်သာ စောင့်ရင်း သတင်းပေးအလစ်တွင် စကားပြောကြသည်။ သူက ကျနော့်တို့ကို ထောင်တွင်း နေထိုင်နည်းနှင့်ပါတီဘဝ ဖြတ်သန်းမှုများကို ပြောပြသည်။ ပါတီတွင်း လမ်းစဉ်တိုက်ပွဲများ အပေါ် သူ့အမြင်ကိုလည်း ရိုးသားစွာ ပြောပြသည်။

                             ထောင်ဝင်စာမှငှက်ပျောသီးထဲတွင် ခဲဆံများ၊ ဘောပင် Refill များခိုးသွင်းပြီး တုတ်တွင် သားရေပင်စည်း၍သုံးသည်။ အိမ်သာသုံး စက္ကူများခွင့်ပြုသဖြင့် ယင်းပေါ်တွင် ကဗျာတွေ စာတမ်းတွေ ဝေဖန်ချက်တွေရေးကြသည်။ ကျနော်တို့လေ့လာရေး ဝိုင်းမှာ အခန်းတိုင်းသို့ ပျံ့နှံ့သွားသည်။ ကျနော်တို့က English လေ့လာမှုကို အရောင်ပြပြီး၊ Mao Thought လေ့လာရေးလုပ်ကြသည်။ နောက်ပိုင်းတွင် ကျနော်တို့၏ လေ့လာရေး အစုအကြောင်း အာဏါပိုင်များသိသွားကာ၊ ကျနော်၊ ကျနော့် အမှုတွဲများဖြစ်သော ကိုခင်မောင်သန်း (လမ်းစဉ်လူငယ်ခေါင်းဆောင်) နှင့် R.I.T ကျောင်းသား တင်သိန်းလွင်တို့ တိုက်ပိတ်ခံရသည်။ တိုက်သစ်တွင် အပိတ်ခံရခြင်းဖြစ်သည်။ ကျနော်တို့ (၃) ယောက်တခန်းတည်းနေရသည်။

                             ကျနော်တို့၏ တဖက်ခြမ်းတွင် R.I.T, G.T.I (အင်းစိန်) နှင့် ရန်ကုန်တက္ကသိုလ်မှ မှိုင်းရာပြည့် သပိတ်ဖြင့် ထောင်ကျကျောင်းသားများရှိနေပြီး မကြာခင် သူတို့နှင့်အဆက်အသွယ်ရသည်။ အခြား တဖက်ခြမ်းတွင် P.D.P ပါတီမှ ဦးထွေးမြင့် ရှိသည်။ ဦးထွေးမြင့်သည် ဖ.ဆ.ပ.လ ခေါင်းဆောင် ဦးကျော်ငြိမ်း၏ ညီတော်စပ်သည်။ သူသည် သေဒဏ်ကို အယူခံမဝင်ခဲ့သော်လည်း ၁၉၇၃ အခြေခံ ဥပဒေ အထိမ်းအမှတ် အဖြစ် တကျွန်း ပြစ်ဒဏ်သို့လျော့ပေါ့ပေးလိုက်သည်။ သူလည်း (၃)ဆောင်မှနေ၍ တိုက်ပိတ်ခံထားရခြင်းဖြစ်သည်။

                             ကျနော်တို့နှင့်ကပ်ရက်အခန်းတွင် ဆေးတက္ကသိုလ် (၁)မှ ကိုခွန်ဆိုင်းနှင့်မြင့်လှိုင်တို့ရှိသည်။ မြင့်လှိုင်မှာ မန္တလေး ဆေးတက္ကသိုလ်တွင် ကျနော့် သူငယ်ချင်းဖြစ်ခဲ့သည်။ ကိုခွန်ဆိုင်းမှာ ၁၉၈၉ တွင် B.C.P  U.G  အဖြစ် အဖမ်းခံခဲ့ရပြီး၊ တတိယအကြိမ်အဖြစ် ရွှေဘိုထောင်မှလွတ်လာပြီး နောက် ပြည်ပသို့ထွက်ခွါသွားကာ ယခု အင်္ဂလန်တွင်တွင် နေသည်။ ကိုခွန်ဆိုင်း၏ အမည်ရင်းမှာ ကိုမျိုးထွန်းဖြစ်သည်။ ထိုအချိန်က တပ်မတော်အရာရှိတဦးဖြစ်သော သူ့ဖခင်မှာ မြို့နယ်ကောင်စီဥက္ကဌတဦးဖြစ်နေသော်လည်း သားဖြစ်သူကို ထောင်ဝင်စာလာတွေ့လေ့ရှိသည်။ ကိုခွန်ဆိုင်းထောင်မှလွတ်ပြီး မင်္ဂလာဈေး တွင် ‘ဆေးဆိုင်’ဖွင့်ထားသည့်အခါ ကျနော်တို့ထောင်ထွက်အားလုံး၏ ‘ဘဏ်တိုက်ကြီး’ ဖြစ်လာပါသည်။ ထောင်အကြိမ်ကြိမ်အတွင်း သူရေးဖွဲ့ခဲ့သည့် “နယ်ဆင်မင်ဒဲလား” နှင့်”ရွှေကျောင်းထက်ကခေါင်းလောင်းသံ” သီချင်းများမှာ ကျနော်တို့ နိုင်ငံရေးအကျဉ်းသားများ၏ အသည်းစွဲ သီချင်းများဖြစ်ကြပါသည်။ မြင့်လှိုင်သည် ၈၈အရေးအခင်းတွင် ရန်ကုန်တက္ကသိုလ် ဆရာသမဂ အတွင်းရေးမှုးဖြစ်လာသည်။ သူသည် ယခု Ph-D ဘွဲ့ရပြီး U.S.A တွင်ရောက်နေသည်ဟုသိရသည်။ သူသည်လည်း ကွန်မြူနစ်ကျောင်းသား တစ်ယောက်ဖြစ်ခဲ့ပါသည်။ သူတို့နှင့်အတူ အင်းတော်မှ ရန်ကုန်တက္ကသိုလ်ကျောင်းသား ကိုစောလှိုင်၊ အင်းစိန်ဂျီတီအိုင်မှ ကိုသန်းရွှေ နှင့် ကိုကျော်ကျော်ဦးတို့ရှိသည်။ စောလှိုင်မှာ ၁၉၉၀ ရွေးကောက်ပွဲတွင် N.L.D ကိုယ်စားလှယ်အဖြစ် အင်းတော်မဲဆန္ဒနယ်မှ ရွေးကောက်ပွဲနိုင်ခဲ့သည်။ ကျော်ကျော်ဦးမှာ ၁၉၈၅ တွင် B.C.P သို့တောခိုသွားခဲ့ပြီး ယခုအခါ N.D.A အဖွဲ့တွင် စာရေး ဆရာငြိမ်းအေးအိမ် အဖြစ် ရပ်တည်နေပါသည်။ ကိုသန်းရွှေမှာ ကွယ်လွန်သွားခဲ့ပါပြီ။

                             အခြားခန်းတွင် ရန်ကုန်တက္ကသိုလ်မှာ ကဗျာဆရာ၊ ပန်းချီဆရာ ကျော်မင်းမောင် နှင့် သူ့အစ်ကို ကျော်ဝင်းမောင်၊ ရန်ကုန်သွားဘက်ဆိုင်ရာ ဆေးတက္ကသိုလ် ကျောင်းသား ကိုအောင်စောဦးတို့ရှိသည်။ ဗိုလ်မှုးချုပ်ကျော်ဇော၏ တူတော်သူ မြတ်ကို နှင့် သူ့သူငယ်ချင်း စိန်ဝင်း တို့ရှိသည်။ သူတို့နှစ်ဦးသည် နောင်တွင် B.C.P သို့တောခိုသွားခဲ့ကြပါသည်။ အောင်စောဦးမှာ N.L.D ပဲခူးတိုင်းစည်းဖြစ်လာပြီး ယခုအခါ ပြည်ပတွင်ရောက်နေပါသည်။ သူသည်လည်း ၁၉၈၂ တွင် B.C.P(UG)အဖြစ် အဖမ်းခံခဲ့ရပါသည်။ ကျော်မင်းမောင်မှာ Graphic Designer တဦးဖြစ်လျက်ရှိပါသည်။ ကျနော်တို့အချင်းချင်း ဆက်သွယ်မိပြီး မကြာမီပင် ကျနော်တို့အားလုံး စုပေါင်း၍ အင်းစိန်ထောင်၊ ထောင်ကျကျောင်းသားများ (တိုက်သစ်) ၏ ကြွေးကြော်သံ “တိုက်မိန့်” စာစောင်ကိုထုတ်ဝေကြသည်။ ကဗျာ၊ ဝတ္ထု၊ ဆောင်းပါး၊ စာတမ်းများပါသည်။ ကျနော်က ထောင်တွင်းပေါ်လစီ နှင့် ပတ်သက်၍ အကြောင်းအချက် ခိုင်လုံရမယ်၊ အကျိုးအမြတ်ရှိရမယ်၊ အကန့်အသတ်ရှိရမယ် ဟူသည့် ‘အ’သုံးလုံး ပေါ်လစီ ကိုတင်ပြသည်။ ညီညွတ်ရေး တပ်ပေါင်းစု မူဖြင့် ရပ်တည်ရန်တင်ပြသည်။ ၁၉၇၅ ဇွန် အရေးအခင်း မှ ထောင်ကျနေသော ဆေး (၁) Final Part –I  ကျောင်းသား ကိုအေးအောင် က အိမ်သာသုံးစက္ကူပေါ်တွင် ကျနော်တို့ ခိုးသွင်းထားသော F.Engle ၏ “Anti-Dutring” ကို “ဒူးရင်းဆန့်ကျင်ရေး” အမည်ဖြင့် ဘာသာပြန်ပေးသည်။ သူ့ဖခင်မှာ တပ်မတော်အရာရှိ တဦးဖြစ်ပြီး သူ့ကိုလန်ဒန်ရှိ မြန်မာသံရုံးတွင် မွေးဖွါးခဲ့သည်ဟု သိရသည်။ နောင်တွင် သူသည် B.C.P သို့တောခိုသွားခဲ့ပါသည်။

                             တိုက်သစ်တွင် (၃) လခန့် ကြာသောအခါ ကျနော်တို့ အားလုံးကို တိုက်ဖွင့်ပေးရန်အာဏာပိုင်များထံ တောင်းဆိုကြပါသည်။ အကြောင်းမပြန်သည့်အတွက် အစာငတ်ခံ တိုက်ပွဲဝင်ရန် ပြင်ဆင်ကြပြီး နောက်နေ့တွင် အစာငတ်ခံဆန္ဒပြကြောင်း အာဏာပိုင်များထံ အကြောင်းကြားလိုက်ကြပါသည်။ သို့ရာတွင် ကျနော်တို့အကြောင်းကြားသည့်နေ့ နေ့လည်ခင်းတွင်ပင် ကျနော်တို့ထဲမှ တဝက်ကို (၃)ဆောင်သို့ ကျနော်အပါအဝင် ကျန်တဝက်ကို တွဲဘက်ထောင်သို့ ပြောင်းရွေ့ပေးလိုက်ကြပါသည်။

* * * * * *

                   “၇၇ ဒီဇင်ဘာလ (၂၀) တိုက်ပွဲ”        

 

                            

သပိတ်..သပိတ်..မှောက်..မှောက်၊ ဖိနှိပ်ချုပ်ခြယ်မှု (အလိုမရှိ)၂

အကြမ်းဖက်မှု..ကျဆုံးပါစေ

တွဲဘက်ထောင်တွင်းဝယ် အကြွေးကြော်သံများပဲ့တင်နေသည်။ အချိန်မှာ မ.ဆ.လ ၏ တတိယအကြိမ် ပါတီညီလာခံ ကျင်းပနေချိန် (၂၀.၁၂.၁၉၇၇) နိုင်ငံရေးအကျဉ်းသား (၄၂)ဦးသည် ပုဒ်မ (၁၄၄) ကိုအာဏာဖီဆန်၍ ညနေထောင်ပိတ်ချိန်တွင် အိပ်ဆောင်တွင်းမဝင်ဘဲ ကြွေးကြော် ဆန္ဒပြနေကြခြင်းဖြစ်ပါသည်။ ကျနော်တို့ တွဲဘက်ထောင်သို့ပြောင်းရွေ့လာသည့်အခါ ဦးသန့်အရေးအခင်းတွင် ဘုန်းကြီး များထားခဲ့သဖြင့် ဘုန်းကြီးတိုက်ဟုခေါ်နေရာတွင်ထားသည်။ ကျနော်တို့အားလုံး ကျောင်းသား(၁၉)ဦးဖြစ်သည်။ တနှစ် ခန်းတွဲတထပ်တိုက် ကျယ်ဖြစ်ပြီး၊ တဖက်တွင် တပ်ဝင်းထရံကာထားသည်။ သစ်သားအိမ်သာတလုံးဝင်းထဲတွင်ရှိသည်။ ချက်ပြုတ်စားသောက်ခွင့်လည်း ပေးထားသဖြင့် နေရသည်မှာ အတော်ပင်အဆင်ပြေပါသည်။ တွဲဘက်ထောင်မှာ သီးခြားဖိုရှိပြီး အစားအသောက်မှာ အင်းစိန်ထောင်မကြီးထက် အများကြီးသာပါသည်။ အဆောင် (၁) နှင့် (၂) တို့တွင် ပြစ်မှုပြစ်ဒဏ်ကျ အကျဉ်းသားထားသည်။ ယင်းတို့ထဲတွင် ရုပ်ရှင်မင်းသား ဇော်ဝမ်း နှင့် မိတ္ထီလာသူဌေး ဦးရှော်ဖီတို့ရှိသည်။ ၅ဆောင်တွင် ၇၅ ဇွန် သပိတ်ထောင်ကျ ကျောင်းသားများရှိသည်။

                             ကျနော်တို့ နံဘေးတွင် ကြိုးတိုက်ရှိပြီး ယင်းကြိုးတိုက်ထဲတွင် ဗိုလ်ကြီး အုန်းကျော်မြင့်ကိုထားသည်။ နောင် ဗိုလ်ကြီး ဘချစ် စိတ်ဖေါက်သွားသည့်အခါ သူ့ကိုလည်း ကြိုးတိုက်မှာထားသည်။ ဗိုလ်ကြီး အုန်းကျော်မြင့်မှာ သေဒဏ်ကျပြီး ဗိုလ်ကြီး ဘချစ်က ထောင်ဒဏ် (၅) နှစ်ကျသည်။ သစ်သားလုံးခြင်းအိမ်ကလေး နှစ်လုံးတွင် ဗိုလ်ချုပ်ကြီး တင်ဦး နှင့် ဗိုလ်မှုးကြီး လှဖေတို့ရှိသည်။ နှစ်ထပ်အိမ်တလုံးတွင် ဗိုလ်မှုးစိန်မြင့်၊ ဗိုလ်ကြီးဝင်းသိန်း နှင့် ဗိုလ်ကြီး ဘချစ် တို့ကိုထားသည်။ သူတို့ အနီးတွင် ဗဟိုထောက်လှမ်းရေးမှ ရုံးခန်းရှိသည်။ နံဘေးတွင် စားဖိုကြီး နှင့် မိန်းဂျေးလ် (Main Jail) ရှိသည်။ တွဲဘက်တထောင်လုံး၏တာဝန်ခံမှာ ဗဟိုထောက်လှမ်းရေးမှ အရာခံ ဗိုလ်လှရွှေဖြစ်ပြီး၊ ကျနော်တို့တိုက်အဆောင်မှုးမှာ ဒုအရာခံဗိုလ်နေမျိုး (ရေ/လမ်း)ဖြစ်သည်။

                             တွဲဘက်ထောင်၏ ထူးခြားချက်မှာ ထောင်ဝင်စာကို ထောင်ဗူးအပြင်ဘက်ထွက်တွေ့ရခြင်းဖြစ်သည်။ ထောင်အပြင်ဘက်ရှိ သစ်သားအိမ်ကလေးတွင် တွေ့ရသည်။ ထောင်ဝင်စာမှာ လွတ်လပ်သည်။ ကြိုက်သလောက်တွေ့ခွင့်ရှိသည်။ ထောင်ဝင်စာမှာ လွတ်လပ်သည်။ ကြိုက်သလောက်တွေ့ခွင့်ရှိသည်။ အချိန်နှင့်အကြိမ် ကန့်သတ်မထား။ အင်းစိန်ထောင်တွင် ထောင်ကျနေစဉ်ကာလ တလျောက်လုံး တွဲဘက်ထောင်တွင် နေရချိန်များသည် ကောင်းမွန်ဆုံးဖြစ်ပါသည်။ နောက်ပိုင်းတွင် ထောင်မကြီးမှ အခြားနိုင်ငံရေး အကျဉ်းသားများထပ်ရောက်လာသည်။ ၎င်းတို့ထဲတွင် B.C.P မှ U.G များပါလာသည်။ ထောင်ဝင်စာတွင် စာအုပ်သွင်းခွင့်ပေးသည်။ ဗဟိုထောက်လှမ်းရေးရုံးမှ တဆင့်သွင်းရခြင်းဖြစ်သည်။ အာဏာပိုင်များက မတ်၊ အိန်ဂျယ်၊ မော်စီတုံး တို့ပုံမပါလျင် စာအုပ်များကို သွင်းခွင့်ပြုသည်။ ကျနော်တို့က ရုပ်ပုံများ ကိုဆုပ်ဖြဲကာသွင်းကြသည်။ ကဗျာစာအုပ်များကို ထုတ်ဝေကြသည်။ ကျနော်၏ လုံးခြင်း ကဗျာစာအုပ် “ အိပ်မက်သေတ္တာထဲက နှင်းဆီကြွေညများ” ကို ကျော်မင်းမောင်က အဖုံးပန်းချီဖွဲပေးပြီး ဝင်းမင်းထွေးက လက်ရေးဖြင့်ရေးပေးသည်။ ကျနော်တို့ တဆောင်နှင့်တဆောင် ကူးကာ သဘောတရားရေးဆွေးနွေးပွဲများလုပ်ကြသည်။ အလုပ်တာဝန်ခွဲဝေကာ ထမင်းထမ်း၊ ပန်းကန်ဆေး၊ ထမင်းဟင်းချက်စသဖြင့် အလှည့်ကျတာဝန်ထမ်းရသည်။ One-Band Radio တလုံးလည်းခွင့်ပြုထားသည်။ ဒုံမင်းနှင့်မယ်ဒလင် တလုံးလည်းရှိသည်။ စာအုပ်များကလည်း ဖတ်မကုန်။ အားလပ်ချိန်များတွင် လေ့လာရေးလုပ်ကြသည်။ ၁၉၇၅ ဇွန်အရေးအခင်းတွင် ရွှေတိဂုံ ဘုရားပေါ်မှ ဖမ်းလာသော (၁၃) နှစ်အရွယ် ( ကျနော်တို့နှင့်တွေ့ချိန်တွင် ၁၅ နှစ်အရွယ် ရှိနေပြီ) အလယ်တန်းကျောင်းသားလေး ပေါက်စနှင့် သန့်စင် ခေါ် တရုတ်ကြီးတို့ကို အင်္ဂလိပ်စာ နှင့် သင်္ချာ သင်ပေးကြသည်။ အခန်းသားတဦးက ပြဿနာရှိလျင် အစည်းအဝေးခေါ်ခွင့်ရှိသည်။ အစည်းအဝေးတွင် မဲဖြင့်ဆုံးဖြတ်သည်။

၁၉၇၇ အောက်တိုဘာခန့်တွင် ထောင်မကြီး ၌ ပုံစံကိုင်သည်ဟုကြားရသည်။ တကယ်အားဖြင့် ၁၉၇၆ ဧပြီလတွင် ပုံစံ စကိုင်သော်လည်း ၃ ဆောင်မှ ကျောင်းသားများက ကိုယ်ထိလက်ရောက်ခုခံသဖြင့် (၁၁.၄.၇၆) အရေးအခင်းဖြစ်ကာ တန့်သွားခဲ့ခြင်းဖြစ်သည်။ ထိုကိစ္စတွင် ကျောင်းသားများရော ဝါဒါများပါ အပြင်းအထန် ဒဏ်ရာရခဲ့ကြသည်။ အဆောင်၃တွင် ပြစ်မှု အကျဉ်းသားများနှင့် နိုင်ငံရေးအကျဉ်းသားများကို ရောပြစ်လိုက်ပြီး နိုင်ငံရေးအကျဉ်းသားများကို တိုက် များနှင့် အခြားရာဇဝတ်ဆောင်များသို့ ပြောင်းရွေ့ပစ်ကြောင်းလည်းကြားရသည်။ ပုံစံကိုင်သည့်နေ့ နံနက် ၄ နာရီခန့်တွင် ၃ဆောင်ကို နှစ်ကြီးသမား၊ ဓါးပြ၊ လူသတ်တရားခံများနှင့် ဝင်ရောက်စီးနင်း ပြီး အိပ်မောကျနေသူများကို အတင်းရိုက်နှက် ပုံစံထိုင်ခိုင်းသည်ဟုသိရသည်။ ပုံစံဆိုသည်မှာ ထိုင်ထားဟုဆိုလျင် တင်ပလ္လင်ခွေထိုင်ကာ လက်နှစ်ဖက်ကို လက်သီးဆုပ်၍ ဒူးပေါ်တင်ထားရသည်။ ရပ်လျက် လက်နှစ်ဖက်ကို ပူးယှက်ကာ ရှေ့ပေါင်ခြံတွင်ကပ်ထားရ၏။ ပုံစံကြီးဟုဆိုလျင် ခြေဖျားထောက် ဆောင့်ကြောင့်ထိုင်ကာ ဦးခေါင်းပေါ် လက်နှစ်ဖက် တင်အုပ်ပြီး ခေါင်းငုံ့ထားရသည်။

                             ကျနော်တို့ နိုင်ငံရေးအကျဥ်းသားများ အကြားတွင် ထောင်ကျချိန်မှစ၍ တိုင်ပင်ထားသည့် ပေါ်လစီ တစ်ရပ်ရှိသည်။ 3.Non-Policy ဟုခေါ်သည်။ ပုံစံလက်မခံ၊ နိုင်ငံတော်သီချင်းမဆို၊ အလုပ်မလုပ်ဟူ၍ဖြစ်သည်။ ကိုကိုးကျွန်းတွင် နိုင်ငံရေး အကျဉ်းသားများက မ.ဆ.လ အစိုးရ၏ ကိုယ်ထူကိုယ်ထ စံနစ်ကို အသေခံတိုက်ခဲ့သည့်အတွက် ကျနော်တို့ အနေဖြင့် ထိုရလဒ်ကို အတတ်နိုင်ဆုံး ထိန်းသိမ်းကာကွယ် သွားရန် ရည်ရွယ်ကြခြင်းဖြစ်သည်။ သို့ဖြင့် တွဲဘက်ထောင်ရှိ နိုင်ငံရေး အကျဉ်းသားအားလုံး ထောင်မကြီး ပုံစံကိုင်သည့် ကိစ္စကို အကြိတ်အနယ် ဆွေးနွေးညှိနှိုင်းကြတော့သည်။ တကယ်ကတော့ တွဲဘက်ထောင်သည် အတော်ကောင်းမွန်လွတ်လပ်သည့် စာအုပ်စာတမ်း ဖတ်ခွင့်ရှိသည်။ ဘော်လီဘော၊ ဘောလုံးကစားခွင့်ရှိသည်။ အဆောင်ချင်း လည်ပတ်ခွင့်ရှိသည်။ ထိုအခြေအနေကို ကျနော်တို့ ထိန်းသိမ်းထားသင့်သည်။ မကြာမီပင် မန္တလေးမှ ထောင်ဝင်စာလာသဖြင့် မန္တလေးတွင်လည်း ပုံစံကိုင်ပြီး ဖြစ်ကြောင်း ကြားရသည်။ ကျောင်းသားများက ပုံစံဆန့်ကျင်သဖြင့် ကိုကျော် နှင့် ကျနော့်ညီ ဖိုးချိုတို့ အရိုက်ခံရ၊ တိုက်ပိတ်ခံရကြောင်းကြားရသည်။ တွဲဘက်ထောင်တွင် ပုံစံကိုင်လာပါက ခုခံရန် ရုပ်ပိုင်း၊ စိတ်ပိုင်းအရ ပြင်ဆင်ကြသည်။

                             ၁၉၇၇ ဒီဇင်ဘာလဆန်းတွင် ကျနော်တို့ အဆောင်မှ ဂျီတီအိုင် ကျောင်းသားမောင်တင်ရှိန်သည် ခြေထောက်အနာဖြစ်သဖြင့် ခွဲစိတ်ကုသရန် ထောင်မကြီး ဆေးရုံသွားတက်ရသည်။ ဆေးရုံတက်ပြီး နှစ်ပတ်ခန့်ကြာသော်လည်း ကိုတင်ရှိန် ပြန်မလာ။ နောက်ပိုင်းတွင် တင်ရှိန်သည် ဆေးရုံမှ ဆင်းပြီး ထောင်မကြီး ရာဇဝတ်ထောင်သို့ ရောက်သွားကြောင်း တိတိကျကျ သိလာရပါသည်။ ထို့ကြောင့် ဤကိစ္စနှင့်ပတ်သက်၍ မကျေမနပ် ဖြစ်ကြသူများက အစည်းအဝေးခေါ်ရာမှ ကျနော်တို့ အကြိတ်အနယ် အခြေအတင် ဆွေးနွေးကြသည်။ တင်ရှိန် နှင့် ပတ်သက်၍ ထောင်အာဏာပိုင်များထံ တရားဝင် စုံစမ်းရန် နှင့် အကယ်၍ ထောင်မကြီးတွင် တင်ရှိန် ရှိနေပါက ပြန်ခေါ်ပေးဖို့ တောင်းဆိုရန် သဘောတူညီကြသည်။ သို့ဖြင့် နောက်နေ့တွင် တိုက်တာဝန်ခံမှ တဆင့် တွဲဘက် ထောင်တာဝန်ခံသို့ တင်ပြပေးရန် ကျနော်တို့ ဝိုင်း၍တောင်းဆိုကြသည်။ နှစ်ရက်သုံးရက်ကြာသော်လည်း အာဏါပိုင်များဘက်မှ တုံ့ပြန်မှုမရှိသဖြင့်၊ ကျနော်တို့ဘက်မှ တောင်းဆိုချက် နှင့် အတူ Action ထည့်ရန် စဉ်းစားကြသည်။ အထိရောက်ဆုံးနည်းမှာ ညနေတန်းပိတ်လျင် အဆောင်ထဲမဝင်ဘဲ တောင်းဆိုကြရန် သဘောတူကြသည်။ ဒီဇင်ဘာ (၁၉)ရက် ညနေတန်းပိတ်လာသည့်အခါ တာဝန်ကျ ဝါဒကို ကျနော်တို့ မဝင်နိုင်ကြောင်း တိုက်အဆောင်မှူးနှင့် ထောင်တာဝန်ခံသို့ သတင်းပို့ရန် ဝိုင်းပြောကြသည်။ တိုက်အဆောင်မှူး ဦးနေမျိုး နှင့် အထူးထောင်တာဝန်ခံ အရာခံဗိုလ် လှရွှေရောက်လာ သည်။ ကျနော်တို့ ၏ တောင်းဆိုချက်များကို တင်ပြ၍ ဤကိစ္စ အဖြူအမည်း မသဲကွဲမခြင်း တိုက်ခန်းထဲသို့ ကျနော်တို့ မဝင်နိုင်ကြောင်း ဝိုင်းပြောကြသည်။ အချိန်မှာ ညနေ ၆ ခွဲခန့် ရှိလာပြီ ဖြစ်သဖြင့် ဦးလှရွှေက ယနေ့ တန်းဝင်ပေးကြပါရန်နှင့် ဤကိစ္စကို မနက်ဖန် (၂၀.၁၂.၇၆) တွင် တိတိကျကျ အဖြေပေးပါမည်ဟု တောင်းပန်သဖြင့် ကျနော်တို့ အထဲဝင်ပေးလိုက်ကြသည်။

                             ၂၀ ရက်နေ့တွင် တင်ရှိန်ကို ပြန်မပို့ပေးနိုင်ဟု အကြောင်းပြန်လာလျင် Action ဘာထည့်မလဲဟု ဆွေးနွေးကြသည်။ အစည်းအဝေးတွင် သဘောထား နှစ်မျိုးကွဲသည်။ အချို့က တင်ရှိန် ကို ပြန်ပို့မပေးလျင် အိပ်ဆောင်ထဲမဝင်ဘဲ ဆက်လက်တင်းခံမည်ဟု သဘောပေးကြသည်။ အများစုက ထောင်ထဲတွင် ကိုယ်ဘယ်နေရာမှာနေချင်သည်၊ ဘယ်သူ့ကိုဘယ်မှာထားပါဟု ပြောခွင့်မရှိ။ ထို့ကြောင့် တိကျရေရာသော အဖြေရလျင် အိပ်ဆောင်ပေးဝင်မည်ဟု သဘောတူကြသည်။ အိပ်ဆောင် မဝင်မည့်သူများမှာ ၇ ယောက်ခန့်သာရှိသည်။ ဒီဇင်ဘာ ၂၀ ရက်ရောက်သောအခါ အိပ်ဆောင်ဝင်မည့် သူများက အစည်းအဝေးထပ်ထိုင်သည်။ အိပ်ဆောင်မဝင်ဘဲ ကျန်သူများမှာ အနည်းစုသာ ဖြစ်သဖြင့် ဆက်လက်တင်းခံလျင် ထိုရဲဘော်များ ရက်ရက်စက်စက် ညှင်းပန်းခံရမည်။ ထို့ပြင် ထောင်မကြီးမှ ရဲဘော်များ ပုံစံဖိနှိပ်မှုအောက် ခံနေရချိန်တွင် ကျနော်တို့က သက်သာသလို မနေသင့်။ ပုံစံ စံနစ်ကို ကျနော်တို့ တိုက်နိုင်သမျှ ခုခံ တိုက်သွားသင့်သည်။ ထို့ကြောင့် ညီညွတ်ရေး စိတ်ဓါတ်ဖြင့် အားလုံး အိပ်ဆောင်မဝင်ဘဲ တိုက်ပွဲဝင်သွားကြရန် ဆုံးဖြတ်လိုက်ကြပါသည်။

                             သပိတ်ကြေငြာပြီးလျင် ညချမ်း ဂီတသီချင်းဆိုကြသည်။ "အားလုံးကိုကျော်ဖြတ်ရမယ်" သီချင်းဖြင့် အားတင်းကြသည်။

                                            တခါတလေကြုံမယ်ဆောင်း.. မိုးလဲတွေ့ရမယ်.. အလိုက်အထိုက်ပေါ့ကွယ်

                                                                                                                                      ဆက်လက်ဖေါ်ပြပါမည်။

                                                                                                                                       တာကောဒီ