Star InactiveStar InactiveStar InactiveStar InactiveStar Inactive
 


            တနေ့တုန်းက ကျောင်းသားတွေကိုအင်္ဂလိပ်စာစင်ပေးရင်း ငယ်ငယ်တုန်းကစိန်ပီတာကျောင်း၊ လေးတန်းမှာသင်ဖူး၊ ကျက်ဖူးတဲ့ အင်္ဂလိပ်ကဗျာဆရာ တောမတ်စ်ဟူးဒ်(Thomas Hood)ရဲ့”မှတ်မိပါရဲ့၊ မှတ်မိပါရဲ့---” (I remember, I remember---) အစချီတဲ့ကဗျာလေးအကြောင်း ပြောဖြစ်သွားပါတယ်။ ကျောင်းတုန်းက တပုဒ်လုံးအလွတ်ကျက်ဖူးပေမဲ့ ကာလကြာမြင့်တာနဲ့မေ့ကုန်ပြီဆိုတော့  ကျောင်းသားတွေပြန်သွားတဲ့ နောက်မှာ အဲဒီကဗျာလေးကို အင်တာနက်ပေါ်မှာ ရှာပြီး ပြန်ဖတ်နေမိပါတယ်၊

                        ”မှတ်မိပါရဲ့၊ မှတ်မိပါရဲ့

                         ငါ့ကိုမွေးခဲ့တဲ့အိမ်ကလေးကိုလေ

                         နေ့ပိုင်းရောက်ရင် အခန်းထဲကို

                         နေရောင်ကပြူတစ်ပြူတစ်လုပ်တတ်တာ” စသဖြင့်အစချီထားတဲ့ ကဗျာကိုဖတ်ရင်း ကိုယ့်ငယ်စဉ်ကအိမ် ကိုပြန်စဉ်းစားမိနေပါတယ်။ ကျနော်ဆိုလိုတာက လူထုတိုက်အခုနေရာကိုမပြောင်းမီ ကျနော်တို့မိသားစုနေခဲ့၊ စာအုပ် တိုက်ဖွင့်ခဲ့တဲ့ ၀င်းလိုက်`ရုပ်ရှင်ရုံနံဘေးကတိုက်ပါ။ အသက်ကြီးတဲ့လူတွေအဖို့ ငယ်ဘ၀ကိုပြန်စဉ်းစားတာဟာ ဇိမ်တမျိုး၊ အရသာတပါးမို့ကျနော်လည်း အတွေးနယ်ချဲ့ချင်တိုင်းချဲ့ပြီး ”မှတ်မိပါရဲ့၊ မှတ်မိပါရဲ့-- ”လုပ်နေမိပါတယ်။     

 

    အငယ်ဆုံးသားဘိုညိုမမွေးခင်က လူထုမိသားစု

             

 

 

 

 

 

 

 

 

 

 

                                              


 

 

 

 

     ကျနော်သတိရနေတာတွေထဲက တချက်က အဲဒီတုန်းက၈၄လမ်းကြီးပေါ်မှာလည်း ကမ္ဘာစစ်ရဲ့ဒဏ်တွေကို ကျောက်ပေါက်မာ တွေလို အကျည်းတန်စွာတွေ့နေရတာပါ။ ဗုံးကျလို့ပျက်နေတဲ့တိုက်တွေ နေရာအနှံ့မှာရှိနေပြီး လူတွေဟာ အဲဒီတိုက်ပြိုတိုက်ပျက်တွေထဲမှာ တဲထိုးအိမ်ဆောက်ပြီးနေခဲ့ကြပါတယ်။ ကျနော်တို့ကတော့ ဗုံးလွတ်လို့ကျန် တဲ့တိုက်(ကြီး)တလုံးရဲ့အောက်ထပ်မှာနေပြီး ကျနော့်အဒေါ် ဒေါ်တင်တင်-ဦးလှဖေတို့ကတိုက်အပေါ်ထပ်မှာ တ၀က်ပိုင်း ပြီးနေကြပါတယ်။

            အိမ်ရှေ့ခန်းမှာရောင်းတဲ့စာအုပ်တွေကိုထည့်ပြထားတဲ့မှန်ဗီရိုတွေနဲ့ ဧည့်သည်ကို ဧည့် ခံတဲ့စာပွဲကုလားထိုင် တစုံရှိပါတယ်၊ ဒီအခန်း လေးက အနံကျယ်ပေမဲ့ ရှေ့ပိုင်းလေးတင်ဖြစ် ပါတယ်။ အဲဒီနောက်မှာမှ အခန်းကြီးနှစ်ခန်း။ တခန်းကအိပ်ခန်းနဲ့ ကပ်လျက်က ထမင်းစား ခန်း ဖြစ်ပါတယ်။ အိမ်နောက်မှာဝိုင်းတ၀ိုင်းရှိပြီး ၀ိုင်းအလယ်မှာတော့ မန္တလေးထုံးစံအတိုင်း မန် ကျည်းပင်ကြီးတပင်ရှိပါတယ်။ နောက်ပြီး အဲဒီ မန်ကျည်းပင်ကြီးအောက်မှာ ကွတ်ပြစ်ကြီး တလုံးနဲ့ ကျနော်တို့စီးတဲ့ ဒန်းရှိပါတယ်။ အဲဒီရဲ့ အနောက်မှာတော့ အမေစိုက်တဲ့ပန်းပင် တွေဟာ အုတ်ကန်လေးတခုကို ၀န်းရံထား ပါတယ်။       

 

                                ညတိုင်ကျရင် ၀င်းလိုက်ရုံက ဓာတ်ရှင်ထဲကအသံတွေကြားရလေ့ရှိပြီး ကျနော်တို့အိမ်ဘေးက မှောင်မိုက်တဲ့ လမ်း ကြားထဲမှာ အမူးသမားတွေအပေါ့စွန့်ကြလို့ တခါတခါ မနက်တိုင်ရောက်ရင် နံစော်နေတာကိုလည်းမှတ်မိနေပါတယ်။ အဲဒီ လမ်းကြားရဲ့တဘက်မှာက အောင်ဇေယျာလက်ဘက်ရည်ဆိုင်ပါ။ တောင်ဘက်ကပ်ရက်မှာကတော့ ဗုံးဒဏ်ထိထားတဲ့ နေရာမှာအိမ်ဆောက်နေကြတဲ့ မအုန်းကြည်-သီသီတို့ရဲ့အိမ်ပါ။ ဆွေရင်းမျိုးရင်းလိုခင်ကြတဲ့ စက်ချုပ်သူအပျိုကြီးညီအမ က အဖေအိုကြီးကိုလုပ်ကျွေးနေကြတာဖြစ်ပါတယ်။

            မျက်နှာချင်းဆိုင်မှာတော့ ကျနော့်အဖိုးအဖွားရဲ့ ၆ခန်းပါတထပ်တိုက်တန်းလေးပါ။ အဲဒီမှာအဖိုးနဲ့အဖွားတို့ဖွင့်ထား တဲ့မြန်မာ စက္ကူဆိုင်ရှိပါတယ်။ ဒီတိုက်တန်းလေးအကြောင်းတွေးလိုက်တိုင်း မမေ့နိုင်တဲ့အဖြစ်အပျက်တခုကို မနေ့တနေ့ ကလိုပဲ မြင်ယောင်လေ့ရှိပါတယ်။ ၁၉၄၉ခုနှစ်၊ မန္တလေးမြို့ကိုလက်နက်ကိုင်တော်လှန်ရေးအင်အားစုတွေက သိမ်းပိုက်ပြီး နောက် ပြန်ဆုတ်သွားချိန်၊ ဖဆပလအစိုးရစစ်တပ်က ပြန်သိမ်းချိန်မှာ ကျနော်တို့မိသားစုအားလုံးကို အဲဒီတိုက်တန်း ရှေ့မှာရပ်ခိုင်းပြီး သေနတ်နဲ့ပစ်ဖို့လုပ်ကြတာပါ။ မျက်စိကျိန်းလောက်တဲ့မန္တလေးနေရောင်ကြီးနဲ့ ကြေးစားစစ်သားတွေကို မျက်နှာမူရင်းကိုယ့်ကံကြမ္မာကိုစောင့်ကြည့်ခဲ့ရတဲ့ တနာရီလောက်ကာလကို ဘယ်လိုမေ့နိုင်ပါ့မလဲ။ သံဃာတော်များနဲ့အရပ် ထဲက လူများက၀ိုင်းပြောကြလို့ လွတ်လာတာကိုလည်းမှတ်မိနေပါတယ်။ အိမ်ထဲပြန်ရောက်ကြတော့ တအိမ်သားလုံး ဘာမှမပြောကြပဲ ထိုင်နေကြတာလည်း သတိရမိပါတယ်။ နောက်ပြီး ဒီအိမ်ထဲကနေပဲ လူထုသတင်းစာရိုက်တဲ့စက်ကို ဒိုင်းနမိုင်းနဲ့ခွဲတဲ့အသံကြီးကို ကြားကြရတာပါပဲ။

            ကျောင်းမသွားသေးတဲ့အရွယ်၊ ကလေးမို့ အဲဒီတုန်းက မန္တလေးရဲ့အဓိကလမ်းမကြီးတခုဖြစ်တဲ့ ၈၄လမ်းကြီးကို အားအားရှိတိုင်း ငေးနေလေ့ရှိတာကျနော့်ဝါသနာပါ။ အဲဒီတုန်းက အိမ်ရှေ့မှာလာရပ်တဲ့ အလှူခံနဲ့သူတောင်းစားတွေကို အလှူငွေထည့်ကြတာမှာ ကျနော်တို့အိမ်မှာကျနော်ဟာအများဆုံးလို့ပဲထင်ပါတယ်။ ၈၄လမ်းအပြင် ဗိုလ်ချုပ်လမ်းလို့ လည်းခေါ်တဲ့ ဒီလမ်းမကြီးဟာမန္တလေးရဲ့ အဓိကလမ်းကြီးလို့ဆိုပေမဲ့ အများဆုံးအသုံးပြုသွားလာနေတာက စက်ဘီး သမားတွေပါ။ စက်ဘီးနဲ့စာပို့၊ သတင်းစာပို့၊ ပစ္စည်းပို့တာတွေအပြင် စက်ဘီးနဲ့မုန့်မျိုးစုံရောင်းတယ်၊ စက်ဘီးနဲ့ ထီ လက်မှတ်ရောင်းတယ်၊ ကလေးကို ကျောင်းပို့ကျောင်းကြိုလုပ်တယ်။ ဒါကြောင့်မို့ အဲဒီတုန်းကမန္တလေးရဲ့လမ်းမတွေမှာ သာမက လမ်းကြိုလမ်းကြားတွေပါမှာမကျန် စက်ဘီးဟာတမိုးလုံး ဖျောက်ဆိတ်ဖြစ်နေခဲ့ပါတယ်။ 

            ကလေးတယောက်အဖို့တော့ လမ်းမပေါ်မှာတွေ့ရတာဟာ ဂျစ်ကားအပါအ၀င် ဒုတိယကမ္ဘာစစ်ကြီးကကျန်ရစ်တဲ့ ကားမျိုးစုံသာဖြစ်ပေမဲ့ မန္တလေး-တောင်မြို့(အမရပူရ)ပြေးဆွဲတဲ့ဒေါ့ဂျစ်ဘတ်စ်ကားတွေ၊ (အဲဒီတုန်းကမြို့တွင်းပြေး ကားပြာ လိုင်း၊ ကားဝါလိုင်းတွေမရှိသေးပါဘူး)၊ ထရပ်ကားတွေဟာ ဆိုက္ကား၊ မြင်းလှည်းတွေထက်တော့ စိတ်ဝင်စားစရာကောင်း နေပါတယ်။

            ဒီနေရာမှာဖြတ်ပြောချင်တာက ကမ္ဘာစစ်ကြီးပြီးသွားတဲ့နောက် မန္တလေးမှာရေသဘင်ပွဲခေတ်စားလာတော့ လူထု သတင်းစာတိုက်သားတွေကလည်း ”လူထုမောင်”ဆိုတဲ့နာမည်နဲ့ အမျိုးသားရေသဘင်အဖွဲ့ ဖွဲ့စည်းဆင်နွှဲခဲ့ပါတယ်။ လူထု တိုက်သမိုင်းမှာ တကြိမ်တည်းသောဆင်နွှဲခြင်းလို့ထင်ပါတယ်။ ”သတင်းစာထဲပါလေအောင်-လူထုမောင်ကိုရွှဲအောင် ပက်ကြ”ဆိုတဲ့ သံချပ်မျိုးတွေအော်လာတဲ့ လူထုမောင်တွေရဲ့ သုံးတန်ကားအလှပြယာဉ်ကို အိမ်ရှေ့ကနေငေးနေခဲ့တာ တော့မှတ်မိပါတယ်။ လူထုမောင်ဆိုတဲ့စာတန်းကို ထရပ်ကားရှေ့မှာရေးထားပြီး အပေါ်မှာဘာရုပ်၊ ဘာအဆင်အပြင်မှမပါ ကားကတုံးနဲ့လှည့်တာကိုပဲ မှတ်မိနေပါတယ်။ ၀ိုးတိုးဝါးတားပါ။

            ၁၉၅၀ခုနှစ်မှာထင်ပါတယ်။ ကျနော်တို့အဲဒီကနေ ဒီနေ့လူထုတိုက်ကိုပြောင်းလာခဲ့ကြပါတယ်။ အဲဒီနောက်မှာ အဲဒီ အဆောက်အဦဟာ အပေါင်ဆိုင်ဖြစ်လိုက်၊ အရက်ဆိုင်ဖြစ်လိုက်၊ စားသောက်ဆိုင်ဖြစ်လိုက် ဘ၀တွေအမျိုးမျိုးဖြတ်သန်းခဲ့ ပါတယ်။ အခုတော့ရှိမှရှိသေးရဲ့လားမသိတော့ပါ။

            ဒါပေမဲ့ ကျနော့်ခေါင်းထဲမှာတော့ရှိနေပါသေးတယ်။

            ဘယ်တော့မှမမေ့ပါ။

ဖိုးသံ(လူထု)