|
| လူငယ်ပန်းချီဆရာ MKM၏ မြို့ပြ ရန်ကုန် စိတ်ကူးရိုက်ခတ်ချက်များအား တည်ဆောက်တင်ဆက်ပြသထား သည့် About Yangon ပန်းချီပြပွဲကို ရန်ကုန်မြို့ပန်းဆိုးတန်းလမ်းရှိ လောကနတ်ပန်းချီပြခန်းတွင် ကျင်းပပြုလုပ်ခဲ့သည်။ ပန်းချီပြပွဲတွင် MKM ၏ရန်ကုန် အကြောင်းစိတ်ကူးထည်များကို ပုံဖော်ထားသည့် ပန်းချီကားချပ်ကြီးများကို တင်ဆက်ပြသထားပါသည်။ ပန်းချီကားကြီးများမှာ ၆၀x၉၀ လက်မရှိ ပန်းချီကားချပ်ကြီးများဖြစ်သည်။ ထူးခြားသည်မှာ ပန်းချီကားချပ်ကြီးများကို မျက်နှာပြင်အပြည့် ကင်းဗတ်စတစ်ခု အပေါ်တွင်ရေးဆွဲထားခြင်းမဟုတ်ဘဲ ကင်းဗတ်စအသေးများဖြင့် သီးခြားရေးဆွဲထားသော အစိတ်အပိုင်း သုံးခုကို ပြန်လည်တပ်ဆင်ပုံဖော်ထားခြင်း ဖြစ်ရာ ပန်းချီကားတစ်ချပ်ချင်းစီ၏ အကြောင်းအရာအပေါ်တွင် ဆက်ထားသည့်အရာများဖြစ်သည့် ဒေါင်လိုက်အစင်းများပါ အထင်အရှားပေါ်နေအောင် ပုံဖော်ထားခြင်းဖြစ်သည်။ ထို့ကြောင့်ပင် မြင်တွေ့နေကျ ရန်ကုန်မြို့ပြမြင်ကွင်းများသည် အဓိပ္ပါယ်သစ်များဖြင့် လှုပ်ခတ်နေစေပါသည်။ |
|
